لاہور : سابق وزیراعلی پنجاب عثمان بزدار کے خلاف مالی بے ضابطگیوں اور اختیار کا ناجائز استعمال کرنے پر اینٹی کرپشن کو درخواست موصول ہوگئی۔
تفصیلات کے مطابق اینٹی کرپشن کوسابق وزیراعلی عثمان بزدارکےخلاف ن لیگ کی درخواست موصول ہوگئی۔
اینٹی کرپشن حکام کا کہنا ہے اپنے آپ کو مسلم لیگ ن کا کارکن ظاہر کرنے والے شخص کی جانب سے درخواست جمع کروائی گئی، جس نے نام خفیہ رکھنے کا کہا ہے۔
درخواست گزار نے کہا ہے کہ عثمان بزداردورحکومت میں مالی بےضابطگیوں میں ملوث رہے اور اختیارات کا ناجائز استعمال کیا۔
درخواست میں کہا گیا کہ عثمان بزدار اور قریبی رفقاء نے غیر قانونی تقررو تبادلے بھی کروائے، جن کی مد میں ناجائز طریقے سے مال بنایا گیا، محکمہ اینٹی کرپشن چھان بین کرکے کارروائی کرے۔
درخواست میں سابق وزیراعلی پنجاب عثمان بزدار کے سیکرٹری طاہر خورشید، عمر بزدار، جعفر بزدار، عامر تیمور، مختار احمد، سمیع اللہ، حبیب گل خان، کیپٹن ریٹائرڈ اعجاز جعفر کو بھی نامزد کیا گیا ہے۔
