پیرس: روسی صدر ولادی میرپیوٹن کے مخالف بلاگر کی فرانس میں گردن کٹی لاش برآمد ہوئی ہے۔
غیرملکی خبررساں ادارے کی رپورٹ کے مطابق مسلمان بلاگر عمران علی کی لاش فرانسیسی شہر لی کے ہوٹل سے برآمد ہوئی، گردن کو تیز دھار آلے سے کاٹا گیا جس کے باعث شہری کی موت واقع ہوئی۔
رپورٹ میں کہا گیا ہے کہ مسلم بلاگر روسی صدر ولادی میرپیوٹن اور اس کی حکومت کا سخت ترین مخالف تھا، اپنی جان بچانے کے لیے اس نے یورپ میں پناہ لی تھی تاہم اسے فرانسیسی ہوٹل میں ہی قتل کردیا گیا۔
فرانس پولیس نے امکان ظاہر کیا ہے کہ یہ ’سیاسی قتل‘ ہوسکتا ہے۔ جبکہ مقتول کے ساتھی کی تلاش جاری ہے جو اس کی موت کے بعد سے ہی منظر عام سے غائب ہے۔ قتل کا یہ واقعہ گزشتہ ہفتے پیش آیا۔
ہوٹل انتظامیہ کا کہنا ہے کہ اپنے مہمان کی حالت اور ضرورت پوچھنے کے لیے عملہ ان کے کمرے میں پہنچا تو عمران علی کی خون میں لت پت لاش پڑی تھی اور سامنے خنجر بھی تھی۔ ابتدائی طور پر کہا جارہا ہے کہ ممکن ہے بلاگر کی موت اسی تیز دھارے آلے سے ہوئی۔
فرانسیسی پولیس کے مطابق معاملہ کی تحقیق کررہے ہیں تاہم اب تک قتل سے متعلق تفصیلات کے لیے روسی حکومت سے رابطہ نہیں کیا، ضرورت پڑنے پر یہ قدم بھی اٹھایا جاسکتا ہے۔
