دنیا کے سب بڑے طیارے ماریا انتونوو اے این-225 بنانے والی کمپنی نے تباہ شدہ طیارے کی بحالی کے لیے عالمی ہوا باز ادارے اور کمپنیوں سے مالی تعاون کا مطالبہ کر دیا ہے۔
تفصیلات کے مطابق یوکرین میں دنیا کا سب سے دیوہیکل طیارہ بنانے والی کمپنی انتونوو نے تمام ممالک کے سربراہان اور ہوا بازی کے شعبے سے وابستہ عالمی کمپنیوں سے کہا ہے کہ اس طیارے کی بحالی کے منصوبے کے لیے مالی تعاون کریں۔
کمپنی نے کہا ہے کہ وہ اس تاریخی طیارے کو، جدید ہوائی جہاز کی تعمیر میں اعلیٰ ترین سائنسی اور تکنیکی کامیابیوں کی علامت کے طور پر بحال کرنا چاہتی ہے تاہم یوکرین اور کمپنی کے پاس مشکل وقت میں اس منصوبے کے لیے رقم نہیں۔
انتونوو نے کہا ہوائی جہاز اور انتونوو برانڈ کے دیگر مصنوعات کی تیاری میں حصہ لینے والی کمپنیاں بھی مالی تعاون کریں، اے این-225 ماریا طیارہ نہ صرف یوکرین بلکہ عالمی ہوا بازی برادری کا فخر ہے، اس لیے کمپنی ہوائی جہاز کی بحالی کے منصوبے کے لیے مضبوط تعاون کی امید رکھتی ہے۔
انتونوو نے کہا کہ اس مقصد کے لیے ایک بین الاقوامی فنڈ قائم کرنے کی تجویز دی گئی ہے، جس کے لیے ہم ناقابل واپسی مالی امداد کے طور پر رقم اکاﺅنٹ میں جمع کرانے کی اپیل کرتے ہیں۔
واضح رہے کہ انتونوو کمپنی نے مالی مدد کے لیے مختلف اکاﺅنٹس نمبر بھی جاری کر دیے ہیں۔
یاد رہے کہ ماریا اے این 225 ایک روسی حملے میں تباہ ہو گیا تھا، دنیا کے سب بڑے اور دیو ہیکل جہاز کی پاکستان سے بھی یادیں وابستہ ہیں، دیوہیکل جہاز نے دو بار کراچی ایئر پورٹ پر لینڈ کیا ہے۔
پہلی بار یہ طیارہ 20 اپریل 2018، دوسری بار 23 جون 2021 میں جناح انٹرنیشنل ایئر پورٹ پر اترا تھا، اس کارگو جہاز کا وزن 600 ٹن ہے، جسے 1988 میں تیار کیا گیا تھا، اس کے 6 انجن تھے جن کی مدد سے یہ اڑان بھر تا تھا، اور جہاز کے پہیوں کی تعداد 32 تھی۔
