اسلام آباد: محکمہ اینٹی کرپشن پنجاب نے وزیر اعلیٰ عثمان بزدار کی ہدایت پر بد عنوانی کے خاتمے کے لیے کی جانے والی کوششوں کو مؤثر بنانے کے لیے ایک ایپ تیار کر لی ہے۔
تفصیلات کے مطابق بد عنوانی کے خلاف کوششوں کو مزید مؤثر بنانے کے لیے ایک ایپ بنا لی گئی ہے، پنجاب کرپشن کمپلینٹ ایپ پر ویڈیو، تصاویر اور شکایات اپ لوڈ ہو سکیں گی، اس کمپلینٹ ایپ پر شکایت کنندہ کو شناخت چھپانے کی سہولت بھی دی گئی ہے۔
ایپ کی تیاری کے بعد اب ترقیاتی منصوبوں میں گھپلوں اور ناقص کام پر شہری شکایت کر سکیں گے، رشوت کا مطالبہ کرنے والے سرکاری افسروں سے متعلق بھی محکمے کو آگاہ کیا جا سکے گا، عثمان بزدار ایپ کی افتتاحی تقریب میں شرکت کے لیے آج اسلام آباد جائیں گے، جب کہ وزیر اعظم عمران خان پنجاب کرپشن کمپلینٹ ایپ کا باضابطہ افتتاح کریں گے۔
تازہ ترین: کرپشن کے خلاف جنگ استحصالی سیاسی نظام کے خلاف جنگ ہے: شہزاد اکبر
دریں اثنا، انٹرنیشنل اینٹی کرپشن ڈے کے موقع پر ڈپٹی چیئرمین نیب حسین اصغر نے ملتان میں میڈیا سے گفتگو کرتے ہوئے کہا کہ سال بھر میں جو پرفارمنس دی وہ مشعل راہ ہے، انٹر نیشنل انڈیکس کے مطابق ملک میں کرپشن کم ہوئی ہے، ہم سے لوگوں کی امیدیں اور زیادہ ہو گئی ہیں۔
ڈپٹی چیئرمین نیب نے کہا کہ ہم قوم کا لوٹا ہوا پیسا واپس لا رہے ہیں، جو کرپٹ ہے وہ انشاء اللہ نہیں بچے گا، جتنے لوگ بند ہیں، جتنی ریکوری ہوئی ہے پہلے کبھی ایسا نہیں ہوا، انگلینڈ سے بھی پیسا آنا شروع ہو چکا ہے اور دیگر ملکوں سے بھی جلد آئے گا۔
