کیلیفورنیا: امریکی ٹیکنالوجی کمپنی ایپل نے دس برسوں میں پہلی بار آئی فون کی پیداوار روک دی ہے۔
تفصیلات کے مطابق 2020 میں وبائی مرض شروع ہونے کے بعد پہلی بار، سپلائی چَین کی رکاوٹوں نے ایپل کو اپنے آئی فون لائن اپ کی پیداوار کو روکنے پر مجبور کر دیا ہے۔
ایپل کے آئی فونز دنیا بھر میں سب سے زیادہ مقبول اسمارٹ فونز میں سے ایک ہیں جن کے کروڑوں ماڈلز ہر سال فروخت ہوتے ہیں، مگر لوگوں کو جلد اس کے مختلف ماڈلز کی دستیابی میں مشکلات کا سامنا ہو سکتا ہے، اور اس کی وجہ چپس کی قلت بتائی گئی ہے۔
ایک جاپانی اخبار نکائے کی رپورٹ کے مطابق ایپل کو سپلائی چَین میں رکاوٹوں، اور چین میں توانائی کے بحران کے باعث کئی دنوں تک سیل فونز کی پیداوار روکنی پڑی تھی۔
رپورٹ میں وضاحت کی گئی ہے کہ رواں ہفتہ جب ایپل کی پیداوار چھٹیوں کے شاپنگ سیزن کی عالمی مانگ کو پورا کرنے کے لیے اوور ٹائم میں جانی تھی، لیکن کارکنوں کو اضافی شفٹوں اور 24 گھنٹے پروڈکشن شیڈول ملنے کی بجائے چھٹی مل رہی ہے۔
ایک سپلائی چَین منیجر نے اخبار کو بتایا کہ پرزہ جات اور چپس کی محدود دستیابی کی وجہ سے، چھٹیوں میں اوور ٹائم کام کرنے اور فرنٹ لائن ورکرز کو اضافی تنخواہ دینے کا کوئی جواز نہیں بنتا۔ انھوں نے کہا کہ ایسا پہلے کبھی نہیں ہوا۔
ایپل نے پہلے ہی اکتوبر میں اپنے آئی فون 13 کی پیداوار کے اہداف میں کٹوتی کی تھی، حتیٰ کہ نومبر میں ایپل کو آئی فون 13 کی پیداوار کو برقرار رکھنے کے لیے آئی پیڈ کی شپمنٹس روک لینی پڑی تھی، لیکن یہ پھر بھی پیداوار کو روکنے سے بچانے کے لیے کافی ثابت نہیں ہوا۔
2021 میں ایپل کا ابتدائی ہدف آئی فون 13 کے 95 ملین ماڈل بنانا تھا، لیکن دسمبر کے آغاز ہی میں یہ تعداد تقریباً 83 سے85 ملین تک گر گئی۔
ستمبر اور اکتوبر میں آئی فون 13 ماڈل کی پیداوار اپنے ابتدائی اہداف سے 20 فی صد کم رہی، جب کہ آئی پیڈ کی پیداوار نے اسی ٹائم فریم میں متوقع حجم کا صرف 50 فی صد حاصل کیا۔
پرانے آئی فونز کی پیداوار میں بھی 25 فی صد کمی آئی، اور جب نومبر اپنے خاتمے پر تھا، تو اس وقت بھی صورت حال کچھ بہتر نہیں تھی۔
رپورٹ کے مطابق آئی فون 13 کے پرزہ جات کے انفرادی سپلائرز کی جانب سے تاخیر کی وجوہ میں ملائیشیا اور ویتنامی لاک ڈاؤن اقدامات، چین میں بجلی کی غیر متوقع پابندیاں، پرزوں کی قلت، پیداوار میں رکاوٹیں، پرزوں کی تیاری کے وقت میں اضافہ اور دیگر وجوہ شامل ہیں۔
