سان فرانسسکو: آئی فون 14 کے نئے موبائل فونز میں صارفین نے خرابی کی شکایت کر دی ہے۔
تفصیلات کے مطابق ایپل نے ابھی جمعہ کو اپنے اعلیٰ درجے کے آئی فون 14 پرو اور پرو میکس جاری کیے ہیں، لیکن اس کے کیمرے میں عجیب خرابی کی شکایات آنے لگی ہیں۔
صارفین نے شکایت کی ہے کہ آئی فون 14 پرو کے کئی ڈیوائس دھندلی اور ہلتی ہوئی فوٹیج ریکارڈ کر رہے ہیں، صارفین کی شکایت پر ایپل نے جواب دیا ہے کہ جلد آئی فون 14 پرو کو ٹھیک کر دیا جائے گا۔
رپورٹس کے مطابق کچھ صارفین نے ٹک ٹاک، اسنیپ چیٹ اور انسٹاگرام جیسی تھرڈ پارٹی کیمرہ ایپس کا استعمال کرتے ہوئے مسائل کی شکایت کی ہے، موبائل فون میں پیچھے موجود کیمرہ باقاعدہ ہلتا ہوا پایا گیا، جس سے تصاویر دھندلی ہو جاتی ہیں، اور کیمرے سے مختلف قسم کی عجیب آوازیں بھی برآمد ہوتی ہیں۔
آئی فون 14 میں سب سے بڑی اپ ڈیٹ؟
صارفین نے اس حوالے سے ٹویٹر پر ایسی ویڈیوز پوسٹ کی ہیں جن میں خامی واضح طور پر دیکھی جا سکتی ہے، ایک یوٹیوبر لیوک میانی نے ٹویٹر پر ایک ویڈیو اپ لوڈ کی جس میں دکھایا گیا ہے کہ اس کا آئی فون 14 پرو میکس کیمرہ اسنیپ چیٹ استعمال کرتے وقت باقاعدہ وائبریٹ ہوتا ہے، جس کی وجہ سے تصویر دھندلی ہو جاتی ہے۔
ٹیک ایپل نے اس حوالے سے کہا ہے کہ یہ مسئلہ اگلے ہفتے تک حل ہو جائے گا۔
