تازہ ترین

نہانے کے پانی میں یہ معمولی چیز شامل کرنا بے شمار فائدوں کا سبب

صحت مند رہنے کے لیے ویسے تو روزانہ نیم گرم پانی سے نہانا چاہیئے لیکن اگر اس میں سیب کا سرکہ شامل کر لیا جائے تو یہ اس پانی کی افادیت کو کئی گنا بڑھا دیتا ہے۔

نہانے کے پانی میں 1 کپ سیب کا سرکہ شامل کریں، ہفتے میں 1 سے 2 بار اس پانی سے نہانا آپ کو درج ذیل فوائد پہنچاتا ہے۔

پی ایچ کی سطح

سرکے میں قدرتی طور پر تیزابیت پائی جاتی ہے، اس سے نہانا جلد کے پی ایچ کی سطح کو توازن میں رکھتا ہے، ساتھ ہی اس میں موجود صحت بخش اجزا ہاضمے میں مدد فراہم کرتے ہیں۔ اس کے علاوہ یہ جوڑوں کے درد میں کمی کا باعث بھی بنتا ہے۔

جلدی بیماریوں میں مفید

نہانے کے پانی میں موجود سیب کا سرکہ اینٹی بیکٹیریل اور زخم مندمل کرنے کی خصوصیات سے مالا مال ہوتا ہے، یہ جلد پر سوزش میں کمی لا کر بیکٹیریا سے ہونے والے انفیکشن کو دور کرنے میں اہم کردار ادا کرتا ہے۔

اسی طرح سورج سے جھلسی جلد کے لیے اس پانی سے نہانا افادیت سے خالی نہیں ہے، یہ درد اور سوجن کو دور کرنے میں مدد فراہم کرتا ہے، ساتھ ہی جلد کے دیگر انفیکشن جیسے ایگزیما، پاؤں کی اینٹھن اور خشکی جیسے مسائل فوری حل کرتا ہے۔

وٹامن اور معدنیات سے بھرپور

سیب کے سرکے میں کئی اہم وٹامنز اور معدنیات موجود ہوتے ہیں جو جلد کو صحت مند رکھنے میں معاون ثابت ہوتے ہیں، یہ جلد پر موائسچرائزنگ کا کام کرتا ہے، اس طرح جلد نرم ملائم ہوجاتی ہے۔

جسم کی بو سے نجات

جسم میں پسینے کے نتیجے میں بیکٹیریا پنپنے لگتے ہیں جو جسم کی بو کا سبب بنتے ہیں، سرکہ چونکہ جراثیم کش خصوصیات رکھتا ہے تو اس طرح یہ بیکٹیریا کے خاتمے کے ساتھ جسم کی بو کو دور کرنے معاون ثابت ہوتا ہے۔

Comments

- Advertisement -