لاہور : چیئرمین واپڈا لیفٹیننٹ جنرل (ر) سجاد غنی کی تعیناتی کو ہائی کورٹ میں چیلنج کردیا گیا۔
تفصیلات کے مطابق لاہور ہائی کورٹ میں چیئرمین واپڈا لیفٹیننٹ جنرل (ر)سجادغنی کی تعیناتی کے خلاف درخواست دائر کردی گئی۔
اے آروائی نیوز براہِ راست دیکھیں live.arynews.tv پر
درخواست میں مؤقف اختیار کیا گیا کہ چیئرمین واپڈا کی تعیناتی اوپن میرٹ اور قوانین کے برعکس کی گئی۔
درخواست میں کہا گیا کہ تعیناتی کیلئے مشترکہ مفادات کونسل سے بامعنی مشاورت آئینی تقاضا ہے، استدعا ہے کہ چیئرمین واپڈا کی تعیناتی غیرآئینی قرار دے کر کالعدم قرار دی جائے۔
یاد رہے 12 اگست کو لیفٹیننٹ جنرل (ر) سجاد غنی کو نیا چیئرمین واپڈا تعینات کیا گیا تھا۔
نئے چیئرمین واپڈا کے لئے ناموں کی سمری ارسال کی گئی تھی ، سمری میں سجاد غنی کا نام سر فہرست تھا جب کہ شمس الدین شیخ اور لیفٹیننٹ جنرل (ر) محمد افضل کا نام بھی شامل تھا۔
چیئرمین واپڈا کی تعیناتی 5 سال کیلئے کی گئی ہے، لیفٹیننٹ جنرل (ر)سجاد غنی واپڈا کے23ویں چیئرمین ہیں۔
واضح رہے کہ لیفٹیننٹ جنرل (ر) مزمل حسین نے چیئرمین واپڈا کے عہدے سے استعفیٰ دیا تھا۔
