اقتصادی رابطہ کمیٹی نے وزارت دفاع کے وی وی آئی پی جہاز کی مرمت کیلئے 33کروڑکی سمری منظور کر لی۔
وزیرخزانہ حماداظہر کی زیرصدارت اقتصادی رابطہ کمیٹی کا اجلاس ہوا جس میں قومی ایئرلائن پی آئی اے کے ری اسٹرکچرنگ پلان کی منظوری دی گئی، ری اسٹرکچرنگ میں جدت اور ٹیکنالوجی کے استعمال پر تبادلہ خیال کیا گیا۔
ای سی سی نے وزارت دفاع کے وی وی آئی پی جہاز کی مرمت کیلئے 33کروڑکی سمری منظوری دی جب کہ وزیراعظم کے ‘ہنر سب کیلئے’ پروگرام کیلئے2 ارب38کروڑ کی گرانٹ منظور کی گئی۔
اجلاس میں وزارت توانائی کی38کروڑ22 لاکھ سےزائدکی 2ضمنی گرانٹس، انصاف امداد احساس پروگرام کیلئےایک ارب کی تکنیکی ضمنی گرانٹ منظور کی گئی۔
بلوچستان میں جاری مختلف اسکیموں کیلئے15 کروڑ منظور کیے گئے جب کہ سرمایہ کاری بورڈ کے اخراجات کیلئے3 کروڑ روپے کی منظوری دی گئی۔
اقتصادی کمیٹی نے ای ووٹنگ کیلئےمشاورت اور اطلاق کیلئے28 کروڑ کی گرانٹ کی بھی منظوری دی۔
