اسلام آباد: وفاقی وزیر داخلہ محسن نقوی نے آزاد کشمیر میں فرنٹیئر کانسٹیبلری تعینات کرنے کی منظوری دے دی۔
تفصیلات کے مطابق وزیراعظم آزاد کشمیر چوہدری انوارالحق نے وزارت داخلہ میں محسن نقوی سے ملاقات کی، ملاقات میں آزاد کشمیر میں امن و امان اور سیکیورٹی صورتحال پر تبادلہ خیال کیا۔
وزیراعظم آزاد کشمیر اور وفاقی وزیرداخلہ محسن نقوی نے سیاسی صورتحال، آزاد کشمیر کے نئے مالی سال کے بجٹ کے حوالے سے گفتگو کی۔
ترجمان وزیر داخلہ کے مطابق وزیرداخلہ محسن نقوی نے وزیراعظم آزاد کشمیر کی درخواست پر آزاد کشمیر میں فرنٹیئر کانسٹیبلری تعینات کرنے کی منظوری دیدی۔
وزیرداخلہ محسن نقوی کا کہنا تھا کہ آزاد کشمیر میں قیام امن کیلئے ہر ممکن تعاون کریں گے، آزاد کشمیر میں سیکیورٹی سے متعلق انتظامات کو بہتر بنایا جائے گا۔
انہوں نے مزید کہا کہ آزاد کشمیر کے عوام سے کئے وعدے پورے کر رہے ہیں، حکومت پاکستان آزاد کشمیر حکومت اور عوام کے ساتھ کھڑی ہے، دوسری جانب وزیراعظم آزاد کشمیر نے مسائل کے حل کیلئے فوری اقدامات پر وزیر داخلہ کا شکریہ ادا کی۔
