ایکوا مین - سمندروں کا دیوتا، اٹلانٹس پرراج کے لیے تیار -
The news is by your side.

Advertisement

ایکوا مین – سمندروں کا دیوتا، اٹلانٹس پرراج کے لیے تیار

ڈی سی کامکس کی واٹر ایکشن فلم کا ٹریلر جاری

ڈی سی کامکس کے مداح ان دنوں بے صبری سے دسمبر میں ریلیز ہونے والی فلم ’ ایکوا مین‘ کا انتظار کررہے ہیں، اور اب ان کے انتظار کو مزید ہوا دینے کے لیے فلم کا ٹریلر جاری کردیا گیا ہے۔

تفصیلات کے مطابق ڈی سی کامکس نے گزشتہ روز ’ ایکوامین‘ کا پانچ منٹ طویل ٹریلر جاری کیا ہے ، جس میں فلم اہم مناظر کی جھلکیاں دکھائی گئی ہیں۔ ٹریلر کو دیکھ کر محسوس ہورہا ہے کہ یہ فلم ایکشن سے بھرپور ہوگی اور مداحوں کی دلچسپی کا سامان بنے گی۔

فلم میں ایکوا مین کا مرکزی کردار ’جیسن موموا‘ ادا کررہے ہیں اور یہ ایک اوریجن اسٹوری ہے ، جس میں ایکوا مین کی پیدائش سے لے اٹلانٹس کے دوبارہ عروج کے لیے لڑی جانے والی جنگ کو مرکزی خیال بنایا گیا ہے۔

ایکوا مین
ایکوا مین اپنی ماں کی آغوش میں آخری بار

اٹلانسٹس ایک افسانوی شہر ہے جس کا تذکرہ افلاطون کی تحریروں میں ملتا ہے، ایک ایسا شہر جو انتہائی زبردست بحری قوت کا حامل ہے اور ایتھنس کے لیے مشکلات پیدا کرتا رہا ہے، کچھ مورخین اسے ایک ایسا شہر تصور کرتے ہیں جو کہ ماضی میں کبھی موجود تھا لیکن اب غرقاب ہوچکا ہے۔

فلم کی کہانی گھومتی ہے اٹلانٹس کے تخت کے گرد ، جیسن اس فلم میں آرتھر یا ایکوا مین کا کردار نبھا رہے ہیں جو کہ سمندر کنارے واقع ایک لائٹ ہاؤس کیپر اور اٹلانٹس کی ملکہ کی محبت کی نشانی ہیں۔ اٹلانٹس کی ملکہ کا بیٹا ہونے کے سبب وہ اس افسانوی شہر کے تخت کے وارث قرار پاتے ہیں، حالانکہ اس سے قبل وہ ایک عام انسان کی سی زندگی گزاررہے ہوتے ہیں۔

ٹریلر میں دکھا یا گیا ہے کہ آرتھر اپنی ساتھی میرا کے ساتھ ایک اساطیری ترشول ( ٹرائی ڈینٹ) کی تلاش میں نکلتے ہیں جو کہ ممکنہ طور پر یونانی اساطیر کے مطابق سمندروں کے خدا ’پوسائڈن‘ کا ہے ۔ اس ترشول کے حصول سے اٹلانٹس کی تمام تر زوال پذیر سلطنتیں اکھٹی ہوکر ایک بار پھر عروج پا سکتی ہیں۔

ایکوا مین
ایکوا مین اور میرا – فلم کا فرسٹ لک

لیکن یہ کام اتنا آسان نہیں اور اس کی راہ میں بے شمار رکاوٹیں اور دشمن ہیں۔ سب سے پہلے تو اٹلانٹس کا موجودہ بادشاہ ’اورم‘ ہی ایکوا مین کا دشمن ہوجائے گا۔ ساتھ ہی ساتھ اس کے مقابلے پر ’بلیک منتا ‘ بھی اتر آئے گا جو کہ ایکوا مین کا روایتی دشمن ہے۔

فلم کی ہدایت کاری کے فرائض جیمز وان انجام دے رہے ہیں جو اس سے قبل ’فاسٹ7‘بنا چکے ہیں۔ ٹریلر میں دکھائے گئے ایکشن مناظر نے انٹرنیٹ کی دنیا میں سنسنی مچادی اور امید کی جارہی ہے کہ ڈی سی کی سابقہ بلاک بسٹر ’ونڈروومن‘ کی طرح یہ فلم بھی کامیابی کے جھنڈے گاڑے گی اور ڈی سی کامکس کےمداحوں کو کئی سال سے طاری مایوسی اور نا امید ی کی فضا سے نجات ملے گی۔

ایکوا مین 21 دسمبر ، 2018 کو دنیا بھر کے سینما گھروں میں نمائش کے لیے پیش کی جائے گی۔ سو انتظار کیجئے ، سمندروں کے بادشاہ کی حکومت کے آغاز کا۔

Comments

comments

یہ بھی پڑھیں