کراچی:بحیرہ عرب میں بننے والے طوفان کے پیش نظر کے پی ٹی نے ریڈ الرٹ جاری کردیا جس میں حفاظتی اقدامات کی ہدایت کی گئی ہے۔
کراچی پورٹ ٹرسٹ کی جانب سے جاری ہونے والے ریڈ الرٹ میں سمندری حدود اور بندرگاہوں پر جہازکے کپتانوں کوحفاظتی اقدامات کی ہدایات کی گئی۔
کے پی ٹی ترجمان کا کہنا تھا کہ بندرگاہوں پرموجود جہازوں کو مزید دو رسوں سے لنگرانداز کریں کیونکہ ممکنہ طوفان کی ہوا کی رفتار 45ناٹ سے 88ناٹ تک ہو سکتی ہے لہذا حفاظتی اقدامات کیے جائیں۔
دوسری جانب سمندری طوفان وایو کےاثرات کراچی سمیت اندرونِ سندھ کے مختلف شہروں پر نمودار ہونا شروع ہوگئے، کیٹی بندر سمیت گردونواح میں تیز ہوائیں چلیں اور مٹی کا طوفان آیا جس کے باعث سمندری لہریں بلند ہوئیں۔
مزید پڑھیں: کراچی میں شدید گرمی کی لہر، رینجرز نے ہیٹ اسٹروک کیمپس قائم کردئیے
بحیرہ عرب میں سمندری طوفان ’وایو‘ کے باعث کراچی میں شدید گرمی،درجہ حرات اکتالیس ڈگری سینٹی گریڈ تک پہنچا جس کے باعث شہریوں کا برا حال ہے، محکمہ موسمیات نے گرمی کی شدت تین روز تک برقرار رہنے کی پیش گوئی کردی۔
محکمہ موسمیات کے ترجمان کا کہنا تھا کہ سمندری طوفان کو گجرات کے ساحل سے ٹکرانا تھا البتہ اُس کا رخ گھوم گیا جس کے بعد بارشیں ہونے کے اثرات کم ہوگئے۔
