کراچی: صدر پاکستان ڈاکٹر عارف علوی نے کہا ہے کہ پاک بحریہ ابھرتے خطرات کے پیش نظر ملکی بحری سرحدوں اور خطے کے بحری مفادات کے تحفظ میں بھرپور کردار ادا کر رہی ہے۔
تفصیلات کے مطابق پاکستان نیول اکیڈمی میں 112 ویں مڈ شپ مین اور 21 ویں شارٹ سروس کمیشن پاسنگ آؤٹ پریڈ منعقد ہوئی۔ صدر پاکستان ڈاکٹر عارف علوی پاسنگ آؤٹ پریڈ کے مہمان خصوصی تھے۔
ترجمان پاک بحریہ کے مطابق نیول اکیڈمی آمد پر پاک بحریہ کے سربراہ ایڈمرل ظفر محمود عباسی نے مہمان خصوصی کا استقبال کیا۔
صدر مملکت نے پاس آؤٹ ہونے والے کیڈٹس کو مبارکباد پیش کی اورنمایاں کارکردگی دکھانے والے مڈ شپ مین اور کیڈٹس میں انعامات تقسیم کیے۔
پاس آؤٹ ہونے والے افسران سے اپنے خطاب میں صدر پاکستان نے کہا کہ افسران اپنے آبا کی روایات اور قوم کی توقعات پر پورا اتریں۔ دوست ممالک کے کیڈٹس کی ٹریننگ کے ذریعےخطے میں امن اور ہم آہنگی کے حصول میں نیول اکیڈمی کا کردار اہم ہے۔
پاسنگ آؤٹ پریڈ میں 199 افسران نے پاک بحریہ میں کمیشن حاصل کیا۔ پاس آؤٹ ہونے والے کیڈٹس میں 53 غیر ملکی اور 7 خواتین کیڈٹس بھی شامل ہیں۔ مڈ شپ مین نوید احمد نے اعزازی شمشیر حاصل کی۔
