اسلام آباد: کسٹم حکام نے افغانستان سے اسمگل ہونے والے اسلحے کی بڑی کھیپ پکڑ لی۔
تفصیلات کے مطابق افغانستان سے بڑے پیمانے پر پاکستان میں اسلحہ اسمگل کرنے کی کوشش ناکام بنا دی گئی، انٹیلیجینس رپورٹ پر کسٹم حکام نے بروقت اور موٴثر کارروائی کی۔
طور خم بارڈر پر افغانستان سے آنے والے کوئلے کے کنٹینر کی چیکنگ کے دوران کسٹم حکام نے بھاری تعداد میں غیر قانونی اسلحہ برآمد کر لیا ہے۔
اسلحہ کنٹینر کے خفیہ خانوں میں چھپا کر رکھا گیا تھا، کسٹم حکام نے اسلحہ برآمد کر کے کنٹینر کے ڈرائیور کو حراست میں لے لیا، افغان ڈرائیور کو قانونی کارروائی کے لیے پولیس کے حوالے کر دیا گیا۔
برآمد ہونے والے اسلحے میں روسی اور ترکیہ ساختہ 12 بور بندوقیں، مختلف ہتھیاروں کے 600 کارتوس اور بھاری مقدار میں بارود شامل ہے۔ پکڑا جانے والا اسلحہ پاکستان دشمن عناصر کی جانب سے امن و امان کی صورت حال خراب کرنے کی کوششوں کا حصہ تھا۔
