The news is by your side.

Advertisement

آرمی چیف کی مدت ملازمت سے متعلق ڈرافٹ تیار، منظوری کابینہ دے گی

اسلام آباد : وفاقی کابینہ نے آرمی چیف کی مدت ملازمت سے متعلق ڈرافٹ کا نیا مسودہ تیار کرلیا جسے کابینہ کی منظوری کے بعد عدالت میں پیش کیا جائے گا، وزیراعظم عمران خان کے آج قوم سےخطاب کی خبریں بےبنیاد ہیں۔

تفصیلات کے مطابق اسلام آباد میں وزیراعظم عمران خان کی زیرصدارت اہم مشاورتی اجلاس ختم ہوگیا، اس حوالے سے ذرائع کا کہنا ہے کہ اجلاس میں سپریم کورٹ میں زیرسماعت آرمی چیف کی مدت ملازمت سے متعلق کیس پر مشاورت کی گئی۔

اجلاس میں فیصلہ کیا گیا کہ کوئی غیر آئینی اور غیر قانونی قدم نہیں اٹھایاجائے گا اورحکومت آرمی چیف جنرل قمر جاوید باجوہ کی مدت ملازمت میں توسیع کے فیصلے پر قائم ہے۔

وزیر اعظم نے قانونی ٹیم سے آگاہی لی، اجلاس میں قانونی ٹیم کی طرف سے سپریم کورٹ کے اعتراضات پر شق وار بریفنگ دی گئی اور سپریم کورٹ کے اعتراضات کی روشنی میں نیا مسودہ تیار کیا گیا، جس میں معروف قانونی ماہرین کی خدمات لی گئی ہیں، مذکورہ ڈرافٹ کابینہ سے سرکولیشن سمری کے ذریعے منظوری لیے جانے کا امکان ہے۔

اس کے علاوہ وزیراعظم عمران خان نے کل پارلیمانی پارٹی کا اجلاس طلب کرلیا ہے، مذکورہ اجلاس کل شام  بروزجمعرات6بجے پارلیمنٹ ہاؤس میں ہوگا، موجودہ سیاسی، معاشی اور سیکیورٹی صورتحال پر تبادلہ خیال کیا جائے گا، پارٹی ارکان کو اجلاس میں حاضری یقینی بنانے کی ہدایت کردی گئی ہے۔

دوسری جانب وزیراعظم عمران خان کے قوم سے خطاب کی خبروں سے متعلق باوثوق ذرائع کا کہنا ہے کہ وزیراعظم عمران خان کا آج قوم سے خطاب کا کوئی امکان نہیں، خطاب کی خبریں بےبنیاد ہیں، وزیراعظم اگر قوم سے خطاب کریں گے تو اس بات کا فیصلہ عدالتی فیصلے کے بعد ہوگا۔

fb-share-icon0
Tweet 20

Comments

comments

یہ بھی پڑھیں