The news is by your side.

Advertisement

جنرل زبیر یا جنرل باجوہ نے حسین نواز سے ملاقات نہیں کی، آئی ایس پی آر

راولپنڈی : پاک فوج کے ترجمان نے کہا ہے کہ جنرل زبیر محمود اور جنرل قمر باجوہ نے حسین نواز سے کوئی ملاقات نہیں کی، اس ضمن میں میڈیا اور سوشل میڈیا پر جو خبریں آئی ہیں ان میں کوئی صداقت نہیں۔

تفصیلات کے مطابق پاک فوج کے شعبہ تعلقات عامہ (آئی ایس پی آر) نے کہا ہے کہ نئے چیئرمین جوائنٹ چیفس آف اسٹاف کمیٹی جنرل زبیر محمود حیات اور نئے آرمی چیف قمر جاوید باجوہ نے وزیراعظم نواز شریف کے بیٹے حسین نواز سے کوئی ملاقات نہیں کی۔

ترجمان نے واضح کیا کہ میڈیا اورسوشل میڈیا پر ان دونوں افسران کی حسین نواز سے ملاقات سے متعلق جو من گھڑت خبریں پھیلائی جارہی ہیں وہ سرا سر جھوٹ پر مبنی ہیں۔

واضح رہے کہ سینئرصحافی و تجزیہ نگار چوہدری غلام حسین نے دعویٰ کیا تھا کہ وزیراعظم  نواز شریف کے صاحبزادے حسین نواز، آرمی چیف اور چیئرمین جوائنٹ چیفس آف اسٹاف کمیٹی سے بحریہ ٹاﺅن فیز 8 کے ایک گھر میں میٹنگ ہوئی ہے۔

وہ ایک نجی ٹی وی چینل کے پروگرام میں مسلم لیگ ن کے جنرل ریٹائرڈ عبدالقیوم سے گفتگو کررہے تھے ۔ بعد ازاں پاک فوج کے محکمہ تعلقات عامہ آئی ایس پی آر نے چوہدری غلام حسین کا یہ دعویٰ جھٹلادیا اور واضح کیا کہ حسین نواز سے آرمی چیف یا چیئرمین جوائنٹ چیفس آف سٹاف کمیٹی سے کوئی ملاقات نہیں ہوئی ۔

Print Friendly, PDF & Email

Comments

comments

یہ بھی پڑھیں