راولپنڈی : آرمی چیف جنرل قمر جاوید باجوہ نے سعودی فرماں روا شاہ سلمان بن عبد العزیز سے ملاقات کی،ملاقات میں دو طرفہ تعلقات اور مقامات مقدسہ کے تحفظ کے لیے اقدامات پر غور کیا گیا۔
پاک فوج کے تعلقات عامہ کے ادارے (آئی ایس پی آر ) کے مطابق آرمی چیف تین روزہ دورے پر سعودی عرب پہنچے ہیں جہاں انہوں نے آج نہایت مصروف دن گزارا اور سعودی فرماں روا شاہ سلمان بن عبد العزیز سے خصوصی ملاقات کی۔
ملاقات کے دوران دونوں رہنماؤں نے اتفاق کیا کہ پاکستان اور سعودی عرب پر مسلم امہ کے حوالے سے اہم ذمہ داریاں ہیں جس کے لیئے دونوں ممالک کو مل کر کام کرنے کی ضرورت ہے بالخصوص دہشتگردی کے خاتمے کے لئے دونوں ممالک نے باہمی تعاون کی ضرورت پر زور دیا۔
دونوں رہنماؤں نے اس بات پر بھی اتفاق کیا کہ انتہاء پسندی کے خاتمے کے لئے دونوں ممالک کو نئے میکانزم اور عزم کے ساتھ کام کرنا ہو گا۔
آئی ایس پی آر کے مطابق قبل ازیں آرمی چیف جنرل قمر باجوہ نے سعودی نائب ولی عہد اور وزیر دفاع محمد بن سلمان سے بھی ملاقات کی، ملاقات کے دوران نائب ولی عہد نے پاکستان میں امن و استحکام کے لئے ہر ممکن حمایت کی یقین دہانی کرائی۔
اس کے علاوہ آرمی چیف نے سعودی افواج کے سربراہ جنرل عبدالرحمان بن صالح سے بھی ملاقات کی۔ ملاقات میں دونوں ممالک کے درمیان دفاعی سطح پر تعاون بڑھانے پر اتفاق کیا گیا۔
آئی ایس پی آر کے ترجمان کا کہنا ہے کہ آرمی چیف جنرل قمر جاوید باجوہ نے آج ہونے والی اہم ملاقاتوں میں سعودی عرب کے مقاماتِ مقدسہ اور سعودی علاقائی سالمیت کی سکیورٹی کے لیے ہر ممکن تعاون کی یقین دہانی کرائی۔