راولپنڈی: آئی ایس پی آر نے کہا ہے کہ آرمی چیف جنرل قمرجاوید باجوہ اور بل گیٹس کے درمیان ٹیلی فونک رابطہ ہوا ہے۔
تفصیلات کے مطابق آرمی چیف جنرل قمر جاوید باجوہ اور مائیکرو سافٹ کے شریک بانی بل گیٹس کے درمیان ٹیلی فونک رابطہ ہوا ہے، جس میں پاکستان میں پولیو کے خاتمے اور کرونا کی روک تھام پر بات چیت کی گئی۔
آئی ایس پی آر کے مطابق آرمی چیف نے کہا پولیو کا خاتمہ اور کرونا وبا کی روک تھام قومی کاز اور کوشش ہے، پاکستان سے جب تک پولیو ختم نہیں ہو جاتا، کامیابی قرار نہیں دے سکتے۔
بل گیٹس نے قومی پولیو مہم میں پاک فوج کے تعاون کی خصوصی تعریف کی اور کہا کہ پاک فوج کے تعاون سے قومی پولیو مہم کے بہتر نتائج آئے ہیں، آرمی چیف جنرل قمر جاوید باجوہ نے کہا پولیو کے سدباب کے لیے پولیو ورکرز سمیت سب کی کوششیں کار فرما ہیں۔
پاکستان میں پولیو کے خاتمے کے لیے بل گیٹس کی تنظیم کے تعاون پر آرمی چیف نے شکریہ ادا کیا۔
