راولپنڈی: آرمی چیف جنرل قمر جاوید باجوہ نے پاک فوج ایک بہترین ادارہ ہے، اس کا وقار اور ساکھ ہر حال میں بحال رکھیں گے۔
یہ بات انہوں نے کمانڈ ہیڈ کوارٹر کھاریاں کا دورہ کرتے ہوئے کہی۔ آرمی چیف نے جہلم میں آرمی فائرنگ کے مقابلے کا فائنل سیشن بھی دیکھا۔
دورے میں ڈی جی آئی ایس پی آر میجر جنرل آصف غفور نے جنرل قمر جاوید باجوہ کو آپریشن کی تیاریوں سے متعلق بریفنگ دی۔ اس دوران ڈی جی آئی ایس پی آر اور آرمی چیف نے فائرنگ مقابلوں کے آخری سیشن کا معائنہ کیا۔
افسران سے خطاب کرتے ہوئے آرمی چیف نے کہا کہ پاکستان آرمی ایک بہترین ادارہ ہے، پیشہ وارنہ تیاریاں جاری رکھی جائیں، پاک فوج کے افسران و جوان اپنی صلاحیتوں کونکھارنے کے لیے ایسے مقابلوں میں شرکت کرتے رہیں۔
قمر جاوید باجوہ سے افسران نے نیوز لیکس سے متعلق سوالات کیے جبکہ فوجی عدالتوں سے متعلق رانا ثناء اللہ کے بیان پر بھی سوالات کیے گئے۔آرمی چیف نے ملکی دفاع کے لیے جانوں کا نذرانہ دینے والے شہداء کی قربانیوں کو خراج تحسین پیش کیا۔
دریں اثنا ڈی جی آئی ایس پی آر آصف غفور نے کہا کہ پاک فوج عظیم ادارہ ہے۔
