اسلام آباد: ملٹری کورٹ سے سزائیں پانے والے دو فوجی اورایک سول افسرکو جیل منتقل کردیا گیا.
تفصیلات کے مطابق آرمی چیف جنرل قمر جاوید باجوہ کی جانب سے تینوں افسران کی سزاؤں میں گزشتہ روز توثیق کی گئی تھی، جنھیں اب جیل منتقل کر دیا گیا ہے.
ذرائع کے مطابق سزا پانے والے افسران اپنے کیسز کی سماعت کے دوران زیرحراست رہے، افسران کے بیرون ملک جانے سے متعلق سوشل میڈیا پراطلاعات صرف افواہیں ہیں.
خیال رہے کہ لیفٹیننٹ جنرل (ر) جاوید اقبال کو 14 سال قید بامشقت کی سزاسنائی گئی تھی، جب کہ بریگیڈیئر (ر) راجا رضوان اور ڈاکٹر وسیم اکرم کو سزائے موت سنائی گئی تھی.
مزید پڑھیں: آرمی چیف نے دو افسران کی سزائے موت، ایک افسر کی قید کی توثیق کردی
سزاپانے والے افسران پر جاسوسی اور قومی سلامتی کے حساس رازافشاں کرنےکے الزامات تھے.
اس ضمن میں ڈی جی آئی ایس پی آر نے کہا تھا کہ سزائیں مسلح افواج کے سخت احتساب کے نظام کامظہر ہے، افسران کودی گئی سزاؤں کا تعلق 3 مختلف کیسز سے ہے، افسران کو ان کےجرائم پرسخت ترین سزائیں دی گئیں۔
یاد رہے کہ گزشتہ دو سال کے دوران 400 افسران کو سزائیں سنائی جاچکی ہیں، جس میں برطرفیاں بھی شامل ہیں۔
