نئی دہلی: بھارت کی عدالت نے نیوز ایڈیٹر ارنب گوسوامی کے خلاف مقدمہ درج کرنے کا حکم دے دیا۔
تفصیلات کے مطابق پاکستان کے خلاف جھوٹا پروپیگنڈا کرنے والے ارنب گوسوامی پر الزام ہے کہ انہوں نے اپنے ایک پروگرام میں کانگریس کے رہنما ششی تھرور کی بیوی کی موت سے متعلق کچھ دستاویز بغیر اجازت کے نشر کیں۔
کانگریس رہنما کا کہنا تھا کہ مذکورہ دستاویزات صرف پولیس کے پاس تھیں، ارنب نے انہیں چوری کر کے ٹی وی پر نشر کیا۔ ششی تھرور کی شکایت پر عدالت نے ارنب گوسوامی اور ری پبلک ٹی وی کے خلاف مقدمہ درج کرنے کا حکم دیا۔ عدالت نے یہ بھی حکم دیا کہ تھرور کی اہلیہ سنندا پشکر کی موت کے حوالے سے افشاں ہونے والی خفیہ معلومات منظر عام پر لانے کی تحقیقات کی جائیں۔
قبل ازیں مجسٹریٹ دھرمیندر سنگھ نے 21 جنوری کو متعلقہ ایس ایچ او کو معاملے کی تحقیقات کرنے اور ایف آئی آر درج کرنے کا بھی حکم دیا تھا جس پر کوئی پیشرفت نہیں ہوئی۔ جج نے حکم دیا کہ ’ہم دیکھیں گے اس معاملے میں کتنے لوگوں سے تفتیش کرنی ہے اور متعلقہ ایس ایچ او نے عدالتی حکم کو نذر انداز کیوں کیا‘۔
عدالت نے ایف آئی آر درج کرنے کا حکم دیتے ہوئے سماعت چار اپریل تک ملتوی کردی۔ بھارتی میڈیا رپورٹ کے مطابق گوسوامی نے اپنے پروگرام میں خفیہ ریکارڈ اور دستاویز دکھا کر یہ ظاہر کرنے کی کوشش کی تھی کہ کانگریسی رہنما ہی اپنی اہلیہ کے قتل ہیں۔
رپورٹ کے مطابق اس سے قبل بھی ششی تھرور دہلی ہائی کورٹ میں چینل اور اینکر کے خلاف ہتک عزت کا دعویٰ کرچکے ہیں، گوسوامی اور چینل انتظامیہ نے پہلی ہی سماعت پر معافی تلافی کر کے معاملہ رفع دفع کرادیا تھا اور عدالت کو یقین دہانی کرائی تھی کہ اب اس طرح کا پروگرام نہیں ہوگا۔
