The news is by your side.

ارشد شریف قتل کیس، 2 رکنی تحقیقاتی ٹیم آج وزیر داخلہ سے ملاقات کریگی

سینیئر صحافی شہید ارشد شریف قتل کیس کی تحقیقات کرنے والی دو رکنی کمیٹی آج وفاقی وزیر داخلہ رانا ثنا اللہ سے ملاقات کرے گی۔

سینیئر صحافی اور ہر دلعزیز اینکر شہید ارشد شریف قتل کیس کے حوالے سے ذرائع نے اے آر وائی نیوز کو بتایا ہے کہ اس کیس کی تحقیقات کرنے والی دو رکنی کمیٹی آج وفاقی وزیر داخلہ رانا ثنا اللہ سے ملاقات کرے گی اور انہیں دبئی سے حاصل ہونے والی معلومات سے آگاہ کرے گی۔

ذرائع کے مطابق تحقیقاتی ٹیم نے مذکورہ کیس میں مراد سعید اور فیصل واوڈا کو بھی آج طلب کر رکھا ہے۔ ان دونوں رہنماؤں کو ارشد شریف شہید کو سیکیورٹی خدشات کی معلومات کے حوالے سے طلب کیا گیا ہے۔

ذرائع کا کہنا ہے کہ فیصل واوڈا آج دن 2 بجے ایف آئی اے میں ٹیم کے سامنے پیش ہوں گے۔ دو رکنی تحقیقاتی ٹیم نے فیصل واوڈا سے پوچھ گچھ کے لیے سوالنامہ تیار کر لیا ہے۔

واضح رہے کہ سینئر صحافی ارشد شریف کی شہادت کی تحقیقات اور حقائق جاننے کیلئے دو رکنی ٹیم گزشتہ ہفتے یو اے ای گئی تھی۔

یہ بھی پڑھیں: ارشد شریف قتل کیس کی تحقیقات 3 ہفتے میں مکمل ہوجائے گی ، ڈائریکٹر انویسٹی گیشن

تحقیقاتی ٹیم میں ڈپٹی ڈی جی آئی بی اور ڈائریکٹر ایف آئی اے شامل تھے۔ ٹیم نے ارشد شریف کے یو اے ای پہنچنے اور کینیا جانے کے معاملے کی تحقیقات کرنے کے ساتھ شہید ارشد شریف سے یو اے ای میں کون کون ملا اس حوالے سے بھی تحقیقات کیں۔

Comments

یہ بھی پڑھیں