اسلام آباد: اینکر ارشد شریف قتل کیس میں ایف آئی اے نے فیصل واوڈا اور مراد سعید کو طلب کرلیا ہے۔
ذرائع کے مطابق دونوں رہنماؤں کو ایف آئی اے کی فیکٹ فائنڈنگ کمیٹی نے طلب کیا، فیکٹ فائنڈنگ کمیٹی کی جانب سے جاری نوٹس میں دونوں رہنماؤں کو شواہد کیساتھ ایف آئی اے ہیڈ کوارٹرطلب کیا گیا ہے۔
ذرائع کا کہنا ہے کہ فیصل واوڈا ،مراد سعید کا دعویٰ تھا کہ وہ ارشد شریف کو لاحق خطرات سے آگاہ تھے۔
یاد رہے کہ گذشتہ ماہ کی 26 تاریخ کو اسلام آباد میں تہلکہ خیز نیوز کانفرنس کرتے ہوئے فیصل واوڈا کا کہنا تھا کہ ارشد شریف کے قتل کی سازش پاکستان میں ہوئی آنے والے چند دنوں میں نام دے دوں گا۔
یہ بھی پڑھیں: مرحوم ارشد شریف نے کیا بتایا تھا؟ مراد سعید کا تہلکہ خیز دعویٰ
ان کا کہنا تھا کہ ارشد شریف ملک چھوڑنے کو تیار نہیں تھے، سازشیوں نے ڈرا دھمکا کر انہیں ملک چھوڑنے پر مجبور کیا وہ پاکستان سے دبئی گئے وہ ویزے کے اختتام تک وہاں رہے، سازش کے تانے بانے اور مقاصد کچھ اور ہیں میں نے گھر والوں کو بتادیا ہے مجھے کچھ ہوا تو تحفے میں انہیں بھی لاشیں ملیں گی۔
فیصل واوڈا نے کہا کہ ارشد شریف کو دبئی سے کینیا بھجوانے والا کوئی عام آدمی نہیں ہے انہیں کینیا ہی کیوں بھجوایا گیا سازش کرنے والوں کے پیچھے وہ لوگ ہیں جو لوگوں کو مروانا چاہتے ہیں لانگ مارچ میں بھی بے گناہ اور خاص لوگوں کا خون دیا جائے گا۔
ادھر رواں ماہ کی چار تاریخ کو پشاور میں پریس کانفرنس کرتے ہوئے مراد سعید کا کہنا تھا کہ ارشد شریف کےحوالےسےتمام تفصیلات میرےپاس ہیں، جاتے جاتے وہ نام بھی دے کرجاچکےہیں،چیف جسٹس سے گزارش ہےکہ ارشد شریف کی والدہ کےمطالبےکےمطابق کمیشن بنایاجائے۔
