کراچی : سندھ ہائی کورٹ نے اے آر وائی نیوز کیس میں چیئرمین پیمرا کو عدالت حاضری سے استثنیٰ کی استدعا مسترد کردی، چیئرمین پیمرا نے شوکاز نوٹس کا جواب جمع کرادیا۔
دوران سماعت سندھ ہائی کورٹ نے چیئرمین پیمرا کو حاضری سے استثنیٰ کی استدعا مسترد کردی، عدالت نے آئندہ سماعت پر چیئرمین پیمرا کو طلب کرلیا۔
اس موقع پر پیمرا کے وکیل کا کہنا تھا کہ ٹی وی چینل کی بحالی کا معاملہ تھا اب چینل بحال ہوچکا ہے، جس پر اے آر وائی نیوز کے وکیل نے جواب دیا کہ اے آر وائی نیوز سندھ ہائیکورٹ کے حکم پر چینل بحال نہیں ہوا، یہ توہین عدالت کی درخواست ہے۔
عدالت نے اے آر وائی نیوز کے وکیل سے مکالمہ کرتے ہوئے کہا کہ پیمرا کی جانب سے جواب کا جائزہ لے لیں، وکیل پیمرا نے کہا کہ چیئرمین پیمرا کی عدالت میں حاضری ختم کی جائے۔
وکیل اے آر وائی نیوز کا کہنا تھا کہ چیئرمین پیمرا کو شوکاز جاری ہوا تھا، چارج فریم ہونا چاہیے، جس پر عدالت نے ریمارکس دیئے کہ آئندہ سماعت پر دیکھیں گے کہ چارج فریم کرنا ہے یا نہیں۔
عدالت کا مزید کہنا تھا کہ پیمرا کے جواب کا جائزہ لے لیا جائے، ایک اور تاریخ پر چیئرمین پیمرا عدالت آئیں پھر دیکھیں گے کہ کیا کرنا ہے۔
اس موقع پر کیبل آپریٹرز کی جانب سے بھی وکیل عدالت میں پیش ہوئے وکیل نے موقف اختیار کیا کہ ہم نے عدالتی احکامات پر عملدرآمد کیا، ہمارے خلاف توہین عدالت کا نوٹس واپس لیا جائے۔
سندھ ہائی کورٹ کے جج نے کہا کہ آئندہ سماعت پر یہ تمام معاملات دیکھیں گے، بعد ازاں عدالت نے درخواست کی مزید سماعت 5 اکتوبر تک ملتوی کردی۔
