کراچی: اے آر وائی کے ہیڈ آف نیوزعماد یوسف کو عدالت میں پیش کردیا گیا ہے، وکلا کی جانب سے ایف آئی آرختم کرنے کی استدعا کی جائے گی۔
تفصیلات کے مطابق اے آر وائی نیوز ہیڈ عماد یوسف کو ملیر کورٹ میں پیش کیا گیا،عماد یوسف کوملیرکورٹ بکتربند میں لایا گیا۔
پیشی کے موقع پر پولیس کی جانب سے عماد یوسف کے وکیل اور اہل خانہ کو ملنے نہیں دیا گیا بعد ازاں وکیل نعیم قریشی کے احتجاج پر انہیں عماد یوسف سے ملاقات کی اجازت دی گئی۔
گزشتہ روزاے آر وائی نیوز کے ہیڈ کے وکیل نعیم قریشی نے عدالت سےایف آئی آرختم کرنےکی استدعا کی تھی۔
یہ بھی پڑھیں: اے آر وائی کے ہیڈ آف نیوز کی گرفتاری پر عمران خان نے سوالات اٹھا دیے
آج گفتگو میں ان کا کہنا تھا کہ ایف آئی آرختم نہ ہوئی توضمانت کی درخواست دینگے، سپریم کورٹ کا حکم ہے کہ ایک کیس میں دو مقدمےنہیں ہوسکتے، اےآر وائی کےہیڈ آف نیوزعماد یوسف کیخلاف کیس ہی نہیں بنتا۔
واضح رہے کہ عماد یوسف کو منگل اور بدھ کی درمیانی شب ڈیفنس کراچی سےگرفتارکیا گیا تھا۔
یاد رہے کہ عماد یوسف کی گرفتاری جس ایف آئی آر کے ذریعے عمل میں آئی ہے اس میں سی ای او اے آر وائی سلمان اقبال، اور ارشد شریف سمیت دیگر صحافی بھی نامزد کیے گئے ہیں۔
ایف آئی آر دفعہ 120،124A،131،153A کے تحت درج کی گئی، جس میں بغاوت اور سازش جیسے سنگین الزامات لگائے گئے ہیں۔
