واشنگٹن: امریکا میں پاکستانی سفیر اسد مجید خان کا کہنا ہے کہ پاکستان میں کرونا وائرس کے حوالے سے حکومت پر تنقید کرنا آسان ہے، امریکا جیسا ملک کرونا وائرس کا مقابلہ نہیں کر پا رہا۔
تفصیلات کے مطابق امریکا میں پاکستانی سفیر اسد مجید خان نے اے آر وائی نیوز سے گفتگو کرتے ہوئے کہا کہ پاکستانی سفارتخانے اور قونصلیٹ آن لائن سروسز فراہم کر رہے ہیں، پاکستانی امریکی ڈاکٹرز فلاحی کاموں میں اہم کردار ادا کر رہے ہیں۔
اسد مجید خان کا کہنا تھا کہ پاکستان میں کرونا وائرس کے حوالے سے حکومت پر تنقید کرنا آسان ہے، امریکا جیسا ملک کرونا وائرس کا مقابلہ نہیں کر پا رہا۔ موجودہ حالات کا سامنا کرنے کے لیے کسی ملک نے سوچا بھی نہ تھا۔
انہوں نے کہا کہ امریکا جیسے ملک میں میڈیکل سپلائی کی کمی دیکھنے میں آرہی ہے، پاکستان میں حکومت کو بہت بڑے چیلنج کا سامنا ہے۔
اسد مجید خان نے مزید کہا کہ امریکا میں مقیم پاکستانیوں نے مشکل وقت میں ہمیشہ ساتھ دیا، موجودہ حالات میں سماجی فاصلہ رکھنا بہت ضروری ہے۔
خیال رہے کہ امریکا میں کرونا وائرس سے اموات کی تعداد 8 ہزار 454 ہوگئی ہے، وائرس سے اموات کی تعداد کے لحاظ سے امریکا دنیا کا تیسرا ملک ہے۔
امریکا میں وائرس سے متاثرہ افراد کی تعداد اب تک 3 لاکھ 11 ہزار سے بھی تجاوز کر چکی ہے۔
