The news is by your side.

Advertisement

پاکستان نے نارتھ ہیمٹن شائر کے خلاف پریکٹس میچ 9 وکٹوں سے جیت لیا

لیگ اسپنر شاداب خان نے میچ میں 10 وکٹیں حاصل کیں

لندن: قومی کرکٹ ٹیم نے اسد شفیق کی شاندار بیٹنگ اور شاداب خان کی عمدہ بالنگ کی بدولت نارتھ ہیمٹن شائر کو پریکٹس میچ میں 9 وکٹوں سے شکست دے دی۔

نارتھ ہیمٹن شائر نے قومی ٹیم کو جیت کے لیے 133 رنز کا ہدف دیا جو قومی ٹیم نے باآسانی ایک وکٹ کے نقصان پر حاصل کرلیا، نارتھ ہیمٹن شائر کی ٹیم اپنی دوسری اننگز میں 301 رنز بناکر آؤٹ ہوگئی تھی، لیگ اسپنر شاداب خان نے میچ میں 10 وکٹیں حاصل کیں۔

پاکستان کی جانب سے دوسری اننگز میں امام الحق 59 اور حارث سہیل 55 رنز کے ساتھ ناٹ آؤٹ رہے جبکہ پہلی اننگز میں اسد شفیق نے ناقابل شکست سنچری اسکور کی تھی۔

پاکستان کی جانب سے شاداب خان اور محمد عباس نے چار، چار کھلاڑیوں کو پویلین کی راہ دکھائی جبکہ راحت علی نے بھی دو وکٹیں حاصل کیں۔

قبل ازیں نارتھ ہیمٹن شائر نے اپنی پہلی اننگز میں 259 رنز اسکور کئے تھے، پاکستان نے اسد شفیق کے شاندار 186 رنز کی بدولت 428 رنز بنائے تھے۔

لیگ اسپنر شاداب خان نے پہلی اننگز میں 6 کھلاڑیوں کو آؤٹ کیا تھا جبکہ دوسری اننگز میں 4 کھلاڑیوں کو پویلین روانہ کیا، شاداب خان کو یاسر شاہ کے ان فٹ ہونے کے سبب قومی ٹیم میں شامل کیا گیا ہے۔

واضح رہے کہ پاکستان اور آئر لینڈ کے درمیان واحد ٹیسٹ 11 مئی سے شروع ہوگا، انگلینڈ کے خلاف پہلا ٹیسٹ 24 مئی اور دوسرا یکم جون کو کھیلا جائے گا۔


خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

Comments

comments

یہ بھی پڑھیں