The news is by your side.

Advertisement

باجوہ کامیاب آرمی چیف ہیں، ایکسٹیشن کا حکومتی اقدام درست ہے، اسد عمر

اسلام آباد : وفاقی وزیر اسد عمر نے کہا ہے کہ جنرل باجوہ کامیاب آرمی چیف ہیں، ایکسٹیشن دینے کا حکومتی اقدام درست ہے،24گھنٹے میں کسی کابینہ ممبر نے اعتراض نہ کیا تو ہاں سمجھا جائے گا۔

ان خیالات کا اظہار انہوں نے اے آر وائی نیوز کے پروگرام آف دی ریکارڈ میں میزبان کاشف عباسی سے خصوصی گفتگو کرتے ہوئے کیا، اسد عمر نے کہا کہ آئین کے مطابق ہم نے اپنی پوزیشن واضح کردی ہے، جنرل قمر جاوید باجوہ کامیاب آرمی چیف ہیں، ان کی مدت ملازمت میں توسیع دینے کا فیصلہ حکومت کا درست اقدام ہے۔

انہوں نے کہا کہ آرٹیکل 243بی کے تحت وزیر اعظم نے فیصلہ کرنا ہوتا ہے، سپریم کورٹ نے ابہام کی بات کی لیکن ایسا نہیں ہے، اس بات میں کوئی ابہام نہیں کہ وزیراعظم کی تجویز پرصدر تقرری کرسکتے ہیں، سپریم کورٹ میں اپنا مؤقف ثابت کریں گے۔

اسد عمر نے کہا کہ سپریم کورٹ نے کہا کہ طریقہ کار درست نہیں تھا لہٰذا عدالت کے اعتراض پر ہم نے نئی سمری منظور کرلی ہے، عدالتی احترام لازم ہے اصولوں کی جنگ میں نہیں الجھنا چاہتے۔

پروگرام میں گفتگو کرتے ہوئے اسد عمر نے کہا کہ بھارتی اقدامات اور خطے کے حالات سب کے سامنے ہیں، ہم حالت جنگ میں نہیں تو اس کے دہانے پر ضرور ہیں۔

اسد عمر کا کہنا تھا کہ آئین کے آرٹیکل243بی کے تحت ہی صدر وزیراعظم کی تجویز کی منظوری دیتے ہیں، قواعد کے تحت کابینہ سمری پر دستخط ہوگئے ہیں،24گھنٹے میں کسی کابینہ ممبر نے اعتراض نہ کیا تو ہاں سمجھا جائے گا۔

fb-share-icon0
Tweet 20

Comments

comments

یہ بھی پڑھیں