لاہور: پاکستان تحریک انصاف کے رہنما اسد عمر نے کہا ہے کہ عمران خان یقین دلاچکے ہیں کہ وہ اسلام آباد عدالت میں پیش ہونگے۔
پاکستان تحریک انصاف کے رہنما اسد عمر نے لاہور میں میڈیا سے گفتگو کرتے ہوئے کہا کہ عمران خان کےناقابل ضمانت وارنٹ جاری ہوئے ہیں، رانا ثنااللہ کے بھی ناقابل ضمانت وارنٹ جاری ہوئے ہیں، ان کےگھرکے باہرکوئی سیکیورٹی اہلکار کیوں موجود نہیں ہے۔
انہوں نے کہا کہ کیا وزیر داخلہ لاپتہ ہوگیا ہے جو پولیس کو مل ہی نہیں رہا، پاکستان کا وزیر داخلہ لاپتہ ہے اور انہیں کچھ پتا ہی نہیں۔
انہوں نے کہا کہ معاملات سدھارنے کیلئے تشدد اور جبر کے علاوہ راستہ تلاش کرنےکیلئے تیار ہیں، گزشتہ کئی ماہ سے پاکستان بد ترین بحران سےگزر رہا ہے، اس بحران سے نکلنےکیلئے ٹھوس بات چیت کرنے کیلئے تیار ہیں۔
اسد عمر کا کہنا تھا کہ ہمارا فارمولہ واضح ہے کہ نئے الیکشن کے بغیر بحران کا کوئی حل نہیں، شہباز شریف کے پاس اسکے علاوہ کوئی حل موجود ہے تو وہ بتائیں، وہ ہمیں ایجنڈا، ٹیم اور وقت بتائیں اگر کوئی ٹھوس چیز نظر آئی ضرور جواب دینگے۔
