لاہور : افعانستان کے صدر اشرف غنی آج لاہور پہنچیں گے، جہاں وہ گورنر پنجاب چوہدری محمد سرور اور وزیر اعلی پنجاب سردارعثمان بزدار سے ملاقات کریں گے جبکہ علامہ محمد اقبال کے مزار پر حاضری بھی دیں گے۔
تفصیلات کے مطابق افغان صدر اشرف غنی آج ایک روزہ دورے پر لاہور پہنچیں گے، وزیراعلیٰ پنجاب ایئر پورٹ پر افغان صدر کا استقبال کریں گے، لاہور پہنچنے پر انھیں اسٹیٹ پروٹوکول دیا جائےگا۔
دورے کے دوران افغان صدر گورنر پنجاب چوہدری محمد سرور اور وزیر اعلی پنجاب سردارعثمان بزدار سے ملاقات کریں گے اور مفکر پاکستان علامہ محمد اقبال کے مزار پر حاضری دیں گے، فاتحہ پڑھیں گے اور پھول چڑھائیں گے۔
افغان صدر تاریخی بادشاہی مسجد کا دورہ بھی کریں گے۔
دوسری جانب افغان صدر کے دورہ لاہورپرسیکیورٹی انتظامات کوحتمی شکل دی گئی ہے ، افغان صدر کا روٹ عام ٹریفک کےلئے بند رہےگا۔
یاد رہے گذشتہ روز افغان صدر اشرف غنی 2 دوزہ دورے پر پاکستان پہنچے تو مشیر تجارت عبدالرزاق داؤد نے ان کا استقبال کیا تھا، اس موقع پر افغان سفیرعاطف مشال اوردفتر خارجہ کے اعلی افسران بھی موجود تھے۔
مزید پڑھیں : وزیر اعظم اور افغان صدر ملاقات کا اعلامیہ، دوستی کے نئے باب کے آغاز پر اتفاق
افغان صدر اشرف غنی نے وزیر خارجہ شاہ محمود قریشی ، وزیراعظم اور صدرعارف علوی سے ملاقاتیں کیں۔
وزیراعظم ہاؤس میں وزیرا عظم عمران خان اور افغان صدراشرف غنی کی ون آن ون ملاقات میں خطے کی سیکیورٹی اورقیام امن سےمتعلق تبادلہ خیال کیا گیا۔
وزیراعظم عمران خان اور افغان صدراشرف غنی کی ملاقات کا اعلامیہ جاری کیاگیا ، جس میں دونوں رہنماؤں کاملاقات میں دوستی کے نئے باب کے آغاز پر اتفاق کیا جبکہ پاکستان اورافغانستان میں عوام کی بہتری کیلئےتعاون بڑھانے پر بھی اتفاق ہوا۔
وزیراعظم نے افغان امن عمل میں بھرپورحمایت جاری رکھنےکےعزم کااعادہ کرتے ہوئے کہا افغانستان میں دہائیوں کےتنازع کاحل پرامن مذاکرات میں ہے، افغان امن کےلیےپاکستان نےافغان مذاکراتی عمل کاساتھ دیا۔
