The news is by your side.

ملک بھر میں آج یوم عاشور عقیدت و احترام کے ساتھ منایا جا رہا ہے

کراچی: ملک بھر میں آج یوم عاشور عقیدت و احترام کے ساتھ منایا جا رہا ہے۔

تفصیلات کے مطابق ملک بھر میں آج یوم عاشور عقیدت و احترام کے ساتھ منایا جا رہا ہے، جلوس کے راستوں پر سیکیورٹی ہائی الرٹ کی گئی ہے، پولیس اور رینجرز کے دستے تعینات اور سی سی ٹی وی کیمروں سے مانیٹرنگ کی جا رہی ہے۔

کراچی میں یوم عاشور کا مرکزی جلوس آج صبح 10 بجے نشتر پارک سے برآمد ہوگا، مرکزی جلوس برآمد ہونے سے پہلے نشتر پارک میں مجلس ہوگی، جلوس مقررہ راستوں سے ہوتا ہوا حسینیہ ایرانیاں امام بارگاہ پر ختم ہوگا۔

مرکزی جلوس کی سیکیورٹی کے فول پروف انتظامات کیے گئے ہیں، جلوس کی سی سی ٹی کیمروں کے ذریعے مانیٹرنگ کی جائے گی، جلوس کی گزر گاہوں پر پولیس اور رینجرز کے 7 ہزار سے زائد اہل کار تعینات ہوں گے، جلوس کی گزرگاہوں میں موبائل فون سروس معطل رہے گی، شہر بھر میں موٹر سائیکل کی ڈبل سواری پر بھی پابندی عائد ہے۔

پشاور میں یوم عاشور کا پہلا جلوس کوچی بازار سے دن 11 بجے برآمد ہوگا، مرکزی جلوس شام 4 بجے امام بارگاہ حیدرشاہ سے برآمد ہوگا، پشاور میں سیکیورٹی ہائی الرٹ ہے، 11 ہزار اہل کار تعینات ہیں۔

اے آر وائی نیوز کی لائیو ٹرانسمیشن دیکھنے کے لیے کلک کریں

ایس ایس پی آپریشن کے مطابق حساس مقامات کو سی سی ٹی وی کیمروں سے مانیٹر کیا جا رہا ہے، اور شہر بھر میں جزوی طور پر موبائل فون سروس معطل ہے۔

راولپنڈی میں یوم عاشور کا مرکزی جلوس امام بارگاہ عاشق حسین تیلی محلہ سے برآمد ہوگا، جس کے لیے سیکیورٹی کے انتہائی سخت انتظامات کیے گئے ہیں، پولیس کی معاونت کے لیے رینجرز کے دستے بھی موجود ہیں۔

اس دوران ڈبل سواری اور موبائل فون سروس اور میٹرو بس سروس معطل رہے گی، جلوس کی فضائی نگرانی، اور مانیٹرنگ کے لیے کنٹرول روم قائم کیا گیا ہے، جلوس کے راستوں پر ماہر نشانہ باز تعینات ہوں گے۔

مرکزی جلوس امام بارگاہ قدیمی میں پہنچ کر اختتام پذیر ہوگا جہاں شام غریباں برپا ہوگی۔

Comments

یہ بھی پڑھیں