اسلام آباد: ایشیائی ترقیاتی بینک پاکستان کی مالی امداد کے لیے آگے آ گیا، پاکستان کو 7 ارب 10 کروڑ ڈالر دے گا، امداد پائیدار ترقی کے اہداف کے حصول کے لیے استعمال کی جائے گی۔
تفصیلات کے مطابق ایشیائی ترقیاتی بینک نے کہا ہے کہ وہ پاکستان کو امداد کی مد میں 7 ارب 10 کروڑ ڈالر دے گا، یہ رقم 3 سال کی مدت کے لیے دی جائے گی۔
[bs-quote quote=”پاکستان میں پرائیویٹ شعبے کی ترقی اور تجارتی فروغ کی ضرورت ہے: ایشیائی ترقیاتی بینک” style=”style-7″ align=”left” color=”#dd3333″][/bs-quote]
ایشیائی ترقیاتی بینک کا کہنا ہے کہ رقم پائیدار ترقی کے اہداف حاصل کرنے کے لیے دی جائے گی، پاکستانی معیشت کو کرنٹ اکاؤنٹ اور مالیاتی خسارے کا سامنا ہے۔
ایشین ڈولپمنٹ بینک نے کہا کہ پاکستان میں پرائیویٹ شعبے کی ترقی اور تجارتی فروغ کی ضرورت ہے، خسارہ کم کرنے کے لیے اداروں میں بھی اصلاحات کی ضرورت ہے۔
ایشیائی ترقیاتی بینک سے جاری اعلامیے میں کہا گیا ہے کہ مالی امداد کو توانائی، بنیادی ڈھانچے کی ترقی اور اداروں کی اصلاحات میں استعمال کیا جائے گا۔ اپنے اعلامیے میں ایشیائی ترقیاتی بینک نے مزید کہا کہ بینک پاکستان میں تعلیم، صحت اور سماجی تحفظ کے لیے پاکستان کے ساتھ ہے۔
یہ بھی پڑھیں: ایشیائی ترقیاتی بینک بی آئی ایس پی کو 30 کروڑڈالرفراہم کرے گا
یاد رہے کہ ایشیائی ترقیاتی بینک کے سینئر عہدے دار نے گزشتہ دنوں وفاقی وزرا سے ملاقات کی تھی، انھوں نے حکومت کے 100 روزہ پلان کو بھی سراہا۔
یاد رہے کہ ایک ماہ قبل ہونے والے ایک معاہدے کے تحت ایشیائی ترقیاتی بینک بے نظیر انکم سپورٹ پروگرام کو تیس کروڑ ڈالر فر اہم کرے گا، یہ رقم 2019 سے 2021 کے دوران جاری کی جائے گی۔
ایک اور معاہدے کے تحت ایشیائی ترقیاتی بینک نے پاکستان کے لیے 10 کروڑ ڈالر کے قرض کی منظوری بھی دی ہے، قرضہ بلوچستان میں پانی کی قلت کودور کرنے کے لیے استعمال ہوگا۔
