مسقط: ایشین ہاکی چیمپئنز ٹرافی کے فائنل میں آج پاکستان کا مقابلہ روایتی حریف بھارت سے ہوگا۔
تفصیلات کے مطابق چیمپئنرٹرافی کے فائنل میں آج پاکستان اور بھارت کے درمیان مقابلہ ہوگا، دونوں ٹیمیں ٹرافی جیتنے کے لیے پُرعزم ہیں۔
اومان کے دارالحکومت مسقط میں گزشتہ روز ایشین ہاکی چیمپئن شپ کے سیمی فائنل میں پاکستان نے ملائیشیا کو شکست دے کر فائنل کے لیے کوالیفائی کیا تھا۔
سلطان قابوس اسپورٹس کمپلکس میں کھیلے گئے سیمی فائنل میں دونوں ٹیموں کے درمیان سخت مقابلہ ہوا تھا اور مقررہ وقت میں میچ 4-4 گول سے برابر رہا تھا۔
میچ کا فیصلہ پینلٹی اسٹوکس پرہوا تھا جس میں پاکستان نے ملائیشیا کو ایک کے مقابلے تین گول سے شکست دی تھی۔
دوسری جانب بھارت نے دوسرے سیمی فائنل میں جاپان کو 2-3 سے شکست دے کرفائنل میں جگہ بنائی تھی۔
ملائشیا کو شکست دے کر پاکستان کی فائنل تک رسائی
یاد رہے کہ 25 اکتوبر کو بھی پاکستان اور ملائیشیا کی ٹیمیں آمنے سامنے تھیں جس میں شاہینوں نے ایک گول سے حریف ٹیم کو شکست دے کر سیمی فائنل تک رسائی حاصل کی تھی۔
چیمپئنز ٹرافی میں پاکستانی ٹیم نے پانچ میچز کھیلے تھے جن میں سے قومی ٹیم کو تین میں فتح جبکہ بھارت کے خلاف شکست کا سامنا کرنا پڑا اور جاپان کے خلاف میچ برابر ہوا تھا۔
