کراچی: قومی کرکٹر محمد حفیظ اور کامران اکمل کے بعد آصف علی بھی لنکن پریمیئر لیگ (ایل پی ایل) سے دستبردار ہوگئے۔
تفصیلات کے مطابق قومی ٹیم کے جارح مزاج بیٹسمین آصف علی قائد اعظم ٹرافی کو ترجیح دیتے ہوئے لنکن پریمیئر لیگ سے دستبردار ہوگئے، آصف علی کا جافنا اسٹالینز سے معاہدہ ہوا تھا۔
آصف علی قائد اعظم ٹرافی میں ناردرن کی نمائندگی کررہے ہیں، انہوں نے کہا کہ وہ ڈومیسٹک کرکٹ میں زبردست کارکردگی دکھا کر ٹیم میں کم بیک کرنا چاہتے ہیں۔
جارح مزاج بیٹسمین نے لیگ میں حصہ نہ لینے کے فیصلے سے جافنا اسٹالینز کو آگاہ کردیا،جافنا اسٹالینز میں آصف علی کے علاوہ قومی ٹیم کے آل راؤنڈر شعیب ملک اور فاسٹ بولر عثمان خان شنواری شامل ہیں۔
واضح رہے کہ لنکن پریمیئر لیگ 26 نومبر سے ہمبنٹوٹا اسٹیڈیم میں کھیلی جائے گی، اس سے قبل کورونا کے باعث ایل پی ایل تین بار ملتوی ہوچکی ہے۔
یاد رہے کہ گزشتہ دنوں محمد حفیظ لنکن پریمیئر لیگ سے دستبردار ہوگئے تھے، ذرائع کا کہنا تھا کہ حفیظ نے اجازت کے لیے پی سی بی سے رابطہ کیا تو ان سے کہا گیا کہ دورہ نیوزی لینڈ کی وجہ سے ایسا ممکن نہیں ہوسکے گا۔
محمد حفیظ نے جب یہ کہا کہ وہ چند میچز کھیل کر سری لنکا سے قومی ٹیم کو نیوزی لینڈ میں جوائن کرلیں گے تو ان سے کہا گیا کہ وہ قومی ٹیم یا ایل پی ایل میں سے کسی ایک کا انتخاب کرلیں جس کے بعد حفیظ نے ایل پی ایل منتظمین سے معذرت کرلی تھی۔
