اسلام آباد: صدر مملکت آصف علی زرداری کی سابق وزیر اعظم و صدر مسلم لیگ (ن) نواز شریف اور وزیر اعلیٰ پنجاب مریم نواز سے ملاقات متوقع ہے۔
ذرائع نے اے آر وائی نیوز کو بتایا کہ آصف علی زرداری اسلام آباد سے لاہور پہنچ گئے جہاں وہ نواز شریف اور مریم نواز سے ملاقات کر سکتے ہیں۔
ذرائع نے بتایا کہ متوقع ملاقات میں پاکستان پیپلز پارٹی کو پنجاب میں درپیش مسائل پر تبادلہ خیال کیا جائے گا، گورنر پنجاب سردار سلیم حیدر بھی صدر مملکت کے ہمراہ موجود ہوں گے۔
یہ بھی پڑھیں: پیپلز پارٹی اراکین پنجاب اسمبلی کی صدر مملکت سے ملاقات، شکایت کے انبار لگا دیے
گزشتہ روز پاکستان پیپلز پارٹی کے اراکین پنجاب اسمبلی نے صدر مملکت آصف علی زرداری سے ملاقات کے دوران شکایت کے انبار لگا دیے تھے۔
آصف علی زرداری نے رہنماؤں سے سوال کیا تھا کہ جنوبی پنجاب میں بجلی و گیس کہاں مل رہی ہے اور کہاں نہیں؟ اس پر انہوں نے متاثرہ علاقوں کی نشاندہی کی تھی۔
اراکین اسمبلی نے کہا تھا کہ بیوروکریسی ہماری بات نہیں سنتی ایک ایڈیشنل سیکرٹری دیا لیکن اس کی کوئی سنتا ہی نہیں، ڈپٹی کمشنر تو کیا اسسٹنٹ کمشنر تک ایڈیشنل سیکرٹری کی بات نہیں سنتا، ایڈیشنل سیکرٹری کہتے ہیں احکامات دیے ہیں لیکن بعد میں پتا چلتا ہے متعلقہ افسر نے نہیں مانا، (ن) لیگی ارکان کے کام فوری ہوتے ہیں تبادلوں سمیت ہر کام کے فوری آرڈر دیے جاتے ہیں۔
انہوں نے بتایا تھا کہ اربوں روپے کا بجٹ لاہور پر لگا دیا ایک ضلع پر نوازشات ہیں، باقی پنجاب ایک طرف ہے یہ کون سا میرٹ ہے؟ لاہور میں اربوں روپے لگا کر ہارس اینڈ کیٹل شو کا انعقاد کیا گیا جبکہ کسانوں کا پنجاب میں کوئی پرسان حال نہیں ہر جگہ سے کسان پس رہا ہے۔
اس پر صدر مملکت نے کہا تھا کہ ہم کسانوں کے ساتھ کھڑے ہیں، سہولیات فراہم کرنے کیلیے ہر ممکن کوشش کی جائے گی۔
رہنماؤں نے بتایا تھا کہ ہم جیت کر ایوان میں آئے لیکن ہمارے کام نہیں ہوتے، ہمارے ہی حلقے میں (ن) لیگی افراد کے کام ہو رہے ہیں، ڈی سیز، ڈی پی اوز، اے سیز سمیت متعلقہ انتظامیہ (ن) لیگی افراد کے کام فوری کرتے ہیں۔
آصف علی زرداری نے کہا تھا کہ آپ سب کے تحفظات جائز ہیں، ہم ان کو جلد حل کروائیں گے، ہماری ترجیحات ملک اور عوام ہیں، ہم ان کے ساتھ کھڑے ہیں، ہم نے ہمیشہ ملک و عوام کی جنگ لڑی۔
انہوں نے مزید کہا تھا کہ بلدیاتی الیکشن کی تیاری کریں ہمیں بھر پور کامیابی حاصل کرنا ہوگی، پنجاب میں بلدیاتی الیکشن میں تاخیر نہیں ہونی چاہیے، بلدیاتی الیکشن کا ہونا بہت ضروری ہے، عوامی مسائل کا حل بلدیاتی الیکشن ہے، ہم عوامی ہیں ہمیں عوام کی جنگ لڑنی ہے۔
ان کا کہنا تھا کہ پانی کا بہت بڑا مسئلہ ہے، سندھ اور بلوچستان کے مسائل حل نہیں ہو رہے، ہمیں مسائل کو سنجیدہ لینا ہوگا، میں ہر فورم پر اس کی نشاندہی کر چکا ہوں، بلاول بھٹو زرداری اور میں خود پنجاب میں بیٹھوں گا۔
ملاقات میں صدر مملکت نے یہ بھی کہا تھا کہ گورنر پنجاب سردار سلیم حیدر کی کارکردگی متاثر کن ہے، وہ بہترین کام کر رہے ہیں، ان کا کام ہے جہاں غلط ہو اس کی نشاندہی کرے اور ایکشن لے۔
