اسلام آباد: گزشتہ روز وزیر اعظم شہباز شریف اور وزیر اعلیٰ خیبر پختونخوا علی امین گنڈاپور کے درمیان اہم ملاقات پر صدر مملکت آصف علی زرداری کا بیان سامنے آگیا۔
صدر مملکت نے وزیر اعظم اور وزیر اعلیٰ خیبر پختونخوا کی ملاقات کا خیر مقدم کرتے ہوئے کہا کہ شہباز شریف اور علی امین گنڈاپور کی ملاقات احسن شروعات ہے، یہی وقت ہے ہم اختلافات دور کرنے کا سوچیں۔
آصف علی زرداری نے کہا کہ ہمیشہ پاکستان کو اولین ترجیح دینے کا حامی رہا ہوں، وقت آگیا ہے لوگوں کو امید دلائیں کہ جمہوری عمل کام کر سکتا ہے۔
گزشتہ روز وزیر اعظم شہباز شریف اور وزیر اعلیٰ خیبر پختونخوا علی امین گنڈاپور کے درمیان ہونے والی اہم ملاقات کا اعلامیہ جاری کیا گیا تھا۔
اعلامیے میں بتایا گیا تھا کہ شہباز شریف نے وزیر اعظم ہاؤس آمد پر وزیر اعلیٰ خیبر پختونخوا علی امین گنڈاپور کا خیر مقدم کیا تھا۔ علی امین گنڈاپور نے صوبے کے انتظامی امور سے متعلق وزیر اعظم کو تفصیلی آگاہ کیا تھا۔
شہباز شریف نے کہا تھا کہ چاروں صوبے وفاق کی اکائیاں ہیں، چاروں صوبے مل کر چلیں گے تو ملک ترقی کرے گا، معاشی صورتحال مدنظر رکھتے ہوئے خیبر پختونخوا کے جائز مطالبات پورے کیے جائیں گے۔
انہوں نے کہا تھا کہ مل بیٹھ کر تمام مسائل کا حل نکالنا ہوگا، تمام مشترکہ کاوشوں میں عوامی فلاح و بہبود اولین ترجیح ہوگی، وفاقی حکومت چاروں صوبوں سے ہم آہنگی اور روابط مضبوط بنانے پر یقین رکھتی ہے۔
اس موقع پر علی امین گنڈاپور نے اس عزم کا اظہار کیا تھا کہ خیبر پختونخوا کی حکومت اچھی نیت سے آگے بڑھنا چاہتی ہے، ملکی ترقی میں اپنا مثبت کردار ادا کرنے کیلیے پُرعزم ہیں۔
اہم ملاقات کے دوران اسحاق ڈار، خواجہ آصف، احسن اقبال، امیر مقام اور متعلقہ حکام موجود تھے۔
