پیر, فروری 17, 2025
اشتہار

جعلی اکاؤنٹس کیس ، آصف زرداری کی ایف آئی اے اور جےآئی ٹی کوتحقیقات سے روکنے کی استدعا

اشتہار

حیرت انگیز

اسلام آباد :جعلی اکاؤنٹس کیس میں سابق صدر آصف زرداری نے سپریم کورٹ میں نئی درخواست دائر کر دی، جس میں ایف آئی اے اور جے آئی ٹی کو تحقیقات سے روکنے کی استدعا کی ہے‌۔

تفصیلات کے مطابق جعلی اکاؤنٹس کیس میں سابق صدر اور پیپلز پارٹی کے شریک چیئرمین آصف زرداری نے پھر سپریم کورٹ سے رجوع کرلیا، آصف زرداری کی جانب سے درخواست ایڈووکیٹ لطیف کھوسہ نے سپریم کورٹ میں دائر کی۔

جس میں موقف اختیار کیا گیا ہے کہ سپریم کورٹ کے فیصلے کے خلاف نظرثانی کی درخواست دائر کرچکے ہیں، جےآئی ٹی کوعدالت نے نیب کی معاونت کرنے کا حکم دیا، عدالتی فیصلے کے بعد بھی ایف آئی اے تحقیقات کررہا ہے۔

درخواست میں کہا گیا ہے کہ ایف آئی اے نے لیگل ایڈوائزر ابوبکر زرداری کو طلب کیا ہے اور ابوبکر زرداری سے بینک اکاونٹس پرپوچھ گچھ کی۔

دائر درخواست میں مزید کہا گیا کہ ایک طرف نیب دوسری طرف ایف آئی اے متوازی تحقیقات کررہا ہے، ایک ہی معاملے پر دو اداروں کا تحقیقات کرنا قوانین کی خلاف ورزی ہے، ایف آئی اے کا تحقیقات جاری رکھنا عدالتی فیصلے کی خلاف ورزی ہے، اسے تفتیش سے روکا جائے۔

اس سے قبل 9 فروری کو سابق صدر آصف زرداری نے جعلی اکاؤنٹس کیس سے متعلق سپریم کورٹ میں جلد سماعت کی نئی درخواست دائر کی تھی ، جس میں استدعا کی گئی تھی کہ نظر ثانی درخواست 12 فروری کو سماعت کے لیے مقرر کی جائے۔

مزید پڑھیں : جعلی اکاؤنٹس: آصف زرداری نے نظرِ ثانی کیس 12 فروری کو سننے کی درخواست کردی

یاد رہے 28 جنوری کو جعلی اکاؤنٹس کیس میں پیپلزپارٹی کے شریک چیئرمین آصف زرداری اور ان کی بہن فریال تالپور نے سپریم کورٹ کے فیصلے کے خلاف نظرثانی درخواست دائر کی تھی ۔

جس میں کہا گیا تھا کہ ایف آئی اے بینکنگ کورٹ میں حتمی چالان داخل کرنےمیں ناکام رہا، قانون کی عدم موجودگی میں مختلف اداروں کی جےآئی ٹی نہیں بنائی جاسکتی، لہذا سپریم کورٹ 7جنوری کے فیصلے کو ری وزٹ اور نظر ثانی کرے اور حکم نامے پر حکم امتناع جاری کرے۔

واضح رہے 7 جنوری کو جعلی بینک اکاؤنٹس کیس میں چیف جسٹس نے جعلی بینک اکاؤنٹس کیس کامعاملہ نیب کو بھجواتے ہوئے مراد علی شاہ اور بلاول بھٹو کا نام جے آئی ٹی رپورٹ اورای سی ایل سے نکالنے کا حکم دیا تھا۔

خیال رہے جعلی بینک اکاؤنٹ کیس میں جے آئی ٹی رپورٹ میں بلاول ہاؤس اور زرداری خاندان کے دیگر اخراجات سے متعلق انتہائی اہم اور ہوشربا انکشافات سامنے آئے تھے کہ زرداری خاندان اخراجات کے لیے جعلی اکاؤنٹس سے رقم حاصل کرتا رہا۔

اہم ترین

ویب ڈیسک
ویب ڈیسک
اے آر وائی نیوز کی ڈیجیٹل ڈیسک کی جانب سے شائع کی گئی خبریں

مزید خبریں