The news is by your side.

Advertisement

آصف زرداری نے ن لیگی رہنما کے بیان پر خاموشی توڑ دی

اسلام آباد: پاکستان پیپلز پارٹی کے شریک چیئرمین آصف علی زرداری نے کہا ہے کہ خواجہ آصف نے میرے خلاف بیان کسی کی ایما پر دیا ہوگا۔

اے آر وائی نیوز کے مطابق آصف زرداری کا خواجہ آصف کے بیان پر ردِ عمل سامنے آ گیا، انھوں نے کہا خواجہ آصف نے میرے خلاف بیان کسی کی ایما پر دیا ہوگا، ان کا بیان اپوزیشن میں دراڑیں ڈالنے کی کوشش ہے۔

زرداری نے کیسز سے متعلق ایک سوال کے جواب میں کہا کہ جب ہم اپوزیشن میں ہوتے ہیں تو ہمارے خلاف اس طرح کے کیس بنتے رہتے ہیں۔

ن لیگی رہنما خواجہ آصف کے بیان پر تبصرہ کرتے ہوئے آصف زرداری نے کہا کہ ان کا بیان اپوزیشن کو تقسیم کرنے کی کوشش ہے۔ ایک صحافی نے سوال کیا کہ حکومت کو مزید کتنا وقت دیکھ رہے ہیں؟ انھوں نے جواب دیا کہ ابھی تو بسم اللہ کی ہے۔

واضح رہے کہ خواجہ آصف نے ایک ٹی وی پروگرام میں کہا تھا کہ انھیں آج بھی آصف زرداری پر تحفظات ہیں اور زرداری سے متعلق ان کی رائے تبدیل نہیں ہوئی۔ انھوں نے کہا میں بار بار کہوں گا کہ مجھے آصف زرداری پر یقین نہیں۔

تاہم خواجہ آصف نے بعد میں ایک بیان میں وضاحت کرتے ہوئے کہا کہ سابق صدر آصف علی زرداری سے متعلق میرا بیان سیاق و سباق سے الگ تھا، میرے بیان سے اگر اُن کی دل آزاری ہوئی ہے تو میں معذرت خواہ ہوں۔

مشتبہ ٹرانزیکشنز : نیب نے خواجہ آصف کے خلاف ایک اور کیس کھول لیا

خواجہ آصف کے بیان پر لندن میں موجود نواز شریف نے بھی رد عمل دے دیا تھا، انھوں نے کہا تھا کہ خواجہ آصف کا آصف زرداری سے متعلق بیان پارٹی پالیسی نہیں، آصف زرداری کے لیے میرے دل میں بڑا احترام ہے، وہ پی ڈی ایم کاحصہ ہیں۔

پاکستان پیپلز پارٹی کے ترجمان چوہدری منظور نے کہا تھا کہ خواجہ آصف نے رخنہ ڈالنے کی کوشش کی ہے، لیکن ان کے بیان کو نواز شریف اور مریم نواز نے ڈس اون کر دیا ہے۔ سابق وزیر اعظم شاہد خاقان عباسی نے بھی رد عمل میں کہا تھا کہ میں پیپلز پارٹی اور ان کی لیڈر شپ پر اعتبار کرتا ہوں، خواجہ آصف کی آصف زرداری سے متعلق بات ذاتی رائے ہے۔ انھوں نے اشارہ بھی دیا کہ جو پی ڈی ایم سے باہر نکلے گا اسے عوام باہر کر دیں گے۔

Comments

یہ بھی پڑھیں