کراچی: سابق صدر اور پاکستان پیپلز پارٹی کے شریک چیئرمین آصف علی زرداری نے کہا ہے کہ تبدیلی ووٹوں سے آنی چاہیے گولی سے نہیں، اتفاق رائے کا عدم احترام اور آئین سے کھلواڑ سیاسی تباہی ہوگا۔

ان خیالات کا اظہار انہوں نے ذوالفقار علی بھٹو کی 39 ویں برسی کے موقع پر اپنے جاری کردہ پیغام میں کیا، آصف زرداری کا کہنا تھا کہ جمہوریت میں طاقت کا سرچشمہ عوام ہیں، ہم ووٹوں کے ذریعے تبدیلی کو مانتے ہیں، گولی کی سیاست کو ہمیشہ رد کیا ہے۔

انہوں نے کہا کہ پی پی حکومت نے آئین میں 18 ویں ترمیم متفقہ طور پر کی، یہ یاد رکھا جائے کہ جب ترمیم کی جارہی تھی تو تمام صوبوں کا اتفاق موجود تھا، ہم جمہوریت پسند لوگ ہیں، تمام صوبوں کے اتفاق رائے سے ترمیم کی گئی۔

ذوالفقار علی بھٹو کی برسی، سندھ حکومت کا 4 اپریل کو عام تعطیل کا اعلان

سابق صدر کا کہنا تھا کہ شہید بھٹو کا بڑا کارنامہ عوام کو مایوسی کے عالم میں امید دلانا تھا، بھٹو نے اندھیروں میں اپنےخون سے راستے منور کیے، شہید ذوالفقار علی بھٹو امید کے کرن تھے اور رہیں گے، انہوں نے ملک کو متفقہ آئین دیا۔

خیال رہے کہ سابق وزیر اعظم ذوالفقار علی بھٹو کی 39 برسی 4 اپریل کو منائی جائے گی، سندھ حکومت کی جانب سے برسی کے موقع پر سندھ بھر میں عام تعطیل کا اعلان کیا گیا ہے جس کا نوٹیفکیشن بھی جاری کردیا گیا ہے۔

غیر ملکیوں کو ذاتی دوست بنانا نواز شریف کی ترجیح رہی ہے، آصف زرداری

یاد رہے کہ شہید بھٹو کی 39 ویں برسی کے موقع پر گڑھی خدا بخش میں دعائیہ تقریب کا انعقاد کیا جائے گا جس میں ملک بھر سے لاکھوں کی تعداد میں عوام اور کارکنان شرکت کریں گے۔

ذولفقار علی بھٹو کی 39 ویں برسی، پنجاب سے جیالوں کے قافلے روانہ

پیپلزپارٹی کی بانی چیئرمین ذوالفقار علی بھٹو کی 39 ویں برسی کل منائی جائے گی جس کے لیے لاہور سمیت پنجاب کے مختلف اضلاع سے جیالوں کے قافلے ریلوے اسٹیشن سے گڑھی خدا بخش  روانہ ہوگئے ہیں، برسی سے متعلق پیپلز پارٹی کی مرکزی تقریب گھڑی خدا بخش میں ہوگی۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔