The news is by your side.

Advertisement

برطانیہ میں پناہ کے خواہشمند ایک اور مشکل میں پھنس گئے

لندن : برطانیہ میں پناہ کی درخواست دینے والوں کو افریقی ملک روانڈا بھیجنے کے حوالے سے برطانوی عدالت نے فیصلہ سنا دیا۔

برطانوی وزیراعظم بورس جانسن کا منصوبہ تھا کہ برطانیہ میں سیاسی پناہ کی درخواست دینے والوں کو روانڈا پہنچا دیا جائے گا اور درخواست کی منظوری تک وہ وہیں قیام کریں گے۔

اس حوالے سے پناہ گزینوں کے حقوق کے گروپوں اور یوکے بارڈر فورس کے اہلکاروں کی نمائندگی کرنے والی ایک ٹریڈ یونین نے اس اقدام کے خلاف حکم امتناعی کے لیے لندن کی ہائی کورٹ میں اس منصوبے کو چیلنج کیا تھا۔

ان کا کہنا تھا کہ یہ منصوبہ پناہ گزینوں کے انسانی حقوق کی سنگین خلاف ورزی ہے اور برطانوی حکومت اپنے اس دعوے کو درست ثابت نہیں کرسکتی کہ روانڈا ایک محفوظ مقام ہے۔

غیر ملکی خبر رساں ادارے کی رپورٹ کے مطابق گزشتہ روز کیس کی سماعت کے بعد برطانوی جج نے برطانیہ میں پناہ کے خواہشمندوں کی ملک بدری کو روکنے کا مطالبہ مسترد کردیا۔

یاد رہے کہ برطانیہ کی حکومت پہلا طیارہ 14جون کو روانڈا کے لیے روانہ کرنے کا ارادہ رکھتی ہے تاکہ غیرقانونی تارکین وطن کو کشتی کے ذریعے اس خطرناک راستے کو طے کرنے سے روکا جا سکے۔

Comments

یہ بھی پڑھیں