پشاور ایئرپورٹ پر قیمتی موبائل سے بھرا بیگ نامعلوم شخص گرفتاری کے خوف سے چھوڑ کر فرار ہوگیا۔
تفصیلات کے مطابق قومی ایئرلائن(پی آئی اے) کی پرواز پی کے284دبئی سے پشاور پہنچی تھی۔ مسافروں نے بیلٹ سے اپنا سامان وصول کرلیا تھا لیکن ایک بیگ بیلٹ پر مشتبہ پایا گیا۔
بعد ازاں سول ایوی ایشن اتھارٹی(سی اے اے) کے عملے نے بیگ کو اپنی تحویل میں لے لیا اور بیگ کو چیک کیا تو اس میں لاکھوں روپے مالیت کے موبائل برآمد ہوئے۔
بیگ میں 141آئی فون موجود تھے۔ سی اے اے نے موبائل سے بھرا بیگ کسٹم کے حوالے کردیا۔
ایئرپورٹ ذرایع کا کہنا ہے کہ کسٹم نے سی سی ٹی وی فوٹیج کی مدد سے مسافر کی تلاش شروع کردی، امکان ظاہر کیا گیا ہے کہ جلد شہری کی گرفتاری عمل میں آئے گی۔
