سابق قومی کرکٹر یونس خان اور باسط علی نے سعود شکیل کی بیٹنگ کی تعریف کرتے ہوئے انہیں اوپر کے نمبر پر بیٹنگ کروانے کا مشورہ دے دیا۔
حیدرآباد میں کھیلے جارہے میچ میں پاکستان کی ٹیم بیٹنگ کرتے ہوئے 49 اوورز میں 286 رنز بنا کر آؤٹ ہوگئی اورنیدرلینڈز کو جیت کے لیے 287 رنز کا ہدف دیا۔
سعود شکیل نے 52 گیندوں پر 68 رنز کی شاندار اننگز کھیلی ان کی اننگز میں 9 چوکے اور ایک چھکا شامل تھا۔
اے آر وائی نیوز کے خصوصی پروگرام میں سابق کرکٹر باسط علی نے کہا کہ سعود شکیل بائیں ہاتھ سے بیٹنگ کرتے ہیں وہ مڈل آرڈرمیں کافی سود مند ثابت ہوسکتے ہیں۔
انہوں نے کہا کہ سعود کو تھوڑا سا اوپر کھلانا چاہیے جہاں پر دو سے تین وکٹیں گریں وہاں سعود شکیل کو بھیجنا چاہیے آخری پندرہ اوورز میں ان کے پاس لفٹنگ پاور نہیں ہے۔
باسط علی نے کہا کہ افتخار اور نواز کو آخری اوورز میں بیٹنگ کروانی چاہیے۔
کامران اکمل نے کہا کہ سعود شکیل کی فارم اچھی لگی ہوئی ہے تو انہیں ضرور اوپر کے نمبر پر بیٹنگ کرواکے آزمانا چاہیے۔
