کراچی : انسداد دہشت گردی عدالت نے آر وائی نیوزحملہ کیس میں جرح کے دوران جج سے بد تمیزی پر ایم کیو ایم رہنما گلفرازخٹک کی ضمانت منسوخ کردی ، جس کے بعد پولیس نے انھیں گرفتار کرلیا۔
تفصیلات کے مطابق انسداد دہشت گردی عدالت2 میں میڈیا ہاؤسز حملہ کیس کی سماعت ہوئی ، عدالت نے گواہ سے جرح کے دوران جج سے بدتمیزی پر ایم کیوایم رہنما گلفراز خٹک کی ضمانت منسوخ کر دی۔
ضمانت منسوخی کے بعد جیل پولیس نے ایم کیوایم رہنما گلفرازخٹک کو گرفتارکرلیا ، عدالت نے گلفراز خٹک کوجیل منتقل کرنے کے بعد رپورٹ پیش کرنے کا حکم دے دیا۔
گل فرازخان ایڈووکیٹ ایم کیوایم پاکستان کے رہنما ہیں ، گل فرازمقدمےمیں ملزم اورکیس میں وکیل بھی ہیں۔
واضح رہے کہ گلفراز خٹک میڈیا ہاؤس پر حملے،پاکستان مخالف تقریر کرنے میں سہولت کار بننے،اشتعال انگیزی پھیلانے اور بغاوت سمیت کئی اہم مقدمات میں ملزم ہے اورکیس میں وکیل بھی ہیں۔
گلفراز خٹک ایم کیو ایم کے کارکنان اور ہمدردوں کو قانونی سہولیات فراہم کرنے والے شعبے لیگل ایڈ کمیٹی کے رکن کی حثیت سے اپنے سیاسی کیریر کا آغاز کیا اور بعد ازاں ایم کیو ایم کی اعلی ترین کمیٹی رابطہ کمیٹی کے رکن بنے۔
