کراچی : سنئیر صحافی اطہر متین شہید کا قاتل اور مرکزی ملزم انور حسین بروہی کراچی پولیس اور قمبر شہدادکوٹ پولیس کے مشترکہ آپریشن میں مارا گیا۔
تفصیلات کے مطابق صحافی اطہر متین کے قتل میں ملوث مرکزی ملزم پولیس مقابلے میں ہلاک ہوگیا، ہلاک ملزم انور حسنی کا کرمنل ریکارڈ اے آر وائی نیوز نے حاصل کرلیا۔
اس حوالے سے پولیس حکام کا کہنا ہے کہ ہلاک ملزم انور حسنی بروہی کے خلاف 13 مقدمات درج ہیں، ملزم کےخلاف بیشتر مقدمات موٹرسائیکل اور کارلفٹنگ کے ہیں۔ پولیس کے مطابق ہلاک ملزم پر زیادہ تر کیسز ڈسٹرکٹ سینٹرل اور ویسٹ میں درج ہوئے۔
پولیس کے مطابق قمبر شہداد کوٹ میں کارروائی کے دوران ملزم مارا گیا، ہلاک ملزم انور حسنی نے صحافی اطہر متین پر فائر کئے تھے۔
اطہر متین کے قتل کیس میں ملوث دیگر2ملزمان گرفتار ہیں، قمبرشہداد کوٹ پولیس اور ویسٹ پولیس نے مشترکہ کارروائی کی، ملزم نے اہلکاروں پر فائرنگ کی، جوابی فائرنگ میں ہلاک ہوا۔
یاد رہے کہ اس سے قبل صحافی اطہر متین قتل کیس کے ایک مرکزی ملزم کو پولیس نے26 فروری کو گرفتار کیا تھا۔
ملزم کو سندھ بلوچستان بارڈر سے گرفتارکیا گیا تھا، ایڈیشنل آئی جی کراچی غلام نبی میمن نے ملزم اشرف بروہی سے تفتیش جاری ہے، اس سلسلے میں مزید تفصیلات جلد میڈیا سے شیئر کی جائیں گی۔
واضح رہے کہ اس سے قبل صحافی اطہر متین کے قتل کے الزام میں کئی افراد کو پہلے سے حراست میں لیا جا چکا ہے۔
