کراچی: معروف گلوکار عاطف اسلم کراچی میں بدترین ٹریفک جام میں پھنسے تو انہوں نے اس کا دلچسپ حل نکال کر مداحوں کو حیران کردیا۔
تفصیلات کے مطابق گذشتہ شب کراچی کے مقامی کلب میں معروف گلوکار عاطف اسلم کا کنسرٹ منعقد ہوا، کنسرٹ کے لیے عاطف اسلم اپنی رہائش گاہ سے نکلے تو ٹریفک جام میں پھنس گئے۔
صورت حال کا اندازہ لگانے کے بعد عاطف اسلم نے ٹھانی کہ کیوں نہ موٹر سائیکل کے زریعے کنسرٹ میں پہنچا جائے، اس منصوبے کو فوری عملی جامہ پہنایا اور سہانے موسم کا لطف اٹھاتے ہوئے بائیک کے ساتھ میوزک کنسرٹ میں جا پہنچے۔
عاطف اسلم سے محبت کرنے والوں کی بڑی تعداد گزشتہ شب انہیں سننے پہنچی جس باعث ٹریفک شدید جام ہوگیا اور عاطف کو بائیک پر کنسرٹ کے احاطے میں داخل ہونا پڑا۔@itsaadee #atifaslam pic.twitter.com/W9CNbSjSQh
— Mohsin Mehdi (@mohsin_rizvee) December 25, 2021
کنسرٹ عاطف اسلم کے مداحوں سے کچھا کھچ بھرا ہوا تھا، اپنے پسندیدہ گلوکار کو بائیک پر آتا دیکھ کر مداح حیران رہ گئے، کئی افراد نے ان دلچسپ لمحات کو اپنے موبائل فون میں بھی قید کیا جبکہ کئی منچلوں نے عاطف اسلم کو بائیک پر آتا دیکھ کر ‘عاطف عاطف’ کے نعرے بھی لگائے۔
عاطف اسلم کے دلچسپ انداز میں کنسرٹ میں داخل ہونے پر سیکیورٹی اہلکاروں کی دوڑیں لگ گئیں اور انہوں نے ہجوم کو قابو میں رکھنے کے ساتھ ساتھ گلوکار کو بحفاظت اسٹیج تک پہنچایا۔