The news is by your side.

Advertisement

ملزم عاطف زمان کا تفصیلی بیان ریکارڈ، 5 افراد کے قتل کی منصوبہ بندی کی تھی

کراچی: ایس ایس پی پولیس کا کہنا ہے کہ ملزم عاطف زمان کا تفصیلی بیان ریکارڈ کر لیا گیا ہے، ملزم نے قتل کی وارداتوں کا بھی اعتراف کر لیا۔

تفصیلات کے مطابق پولیس نے نجی ٹی وی کے اینکر مرید عباس کے قاتل عاطف زمان کا تفصیلی بیان ریکارڈ کر لیا ہے، پولیس کا کہنا ہے کہ ملزم کی حالت خطرے سے باہر ہے۔

ایس ایس پی طارق دھاریجو کا کہنا ہے کہ ملزم نے 5 افراد کو قتل کرنے کی منصوبہ بندی کر رکھی تھی، ملزم نے کروڑوں روپے کی ہیر پھیر کی ہے، جب مکمل پھنس گیا تو قتل کا منصوبہ بنایا، ملزم نے 5 لاکھ سے فراڈ شروع کیا جو کروڑوں تک پہنچا، لوگ پرافٹ کی لالچ میں جڑتے چلے گئے۔

پولیس افسر کے مطابق ملزم نے اعتراف کیا ہے کہ وہ جھوٹ بول کر لوگوں سے پیسے لیتا تھا، اب تک کی تفتیش میں 40 سے 50 کروڑ کے کاروبار کا پتا چلا ہے، ملزم ایک جگہ سے پیسے لے کر دوسری جگہ دیتا رہا، مزید کلائنٹس آنا بند ہوئے تو ملزم پھنستا چلا گیا۔

یہ بھی پڑھیں:  عدالت نے ملزم عاطف زمان کو ریمانڈ میں لینے کی مہلت دے دی

ایس ایس پی نے بتایا کہ تحقیقات میں اصل رقم کا تعین کر رہے ہیں، ملزم کے گھر والوں سے رابطہ نہیں ہوا تاہم ملزم کے وکیل سے رابطہ ہوا ہے، گرفتاری اب تک عاطف کی ہی ہوئی ہے، ملزم کا بھائی بھی جلد گرفتار کر لیا جائے گا جس کی گرفتاری کے لیے ٹیم بنا دی گئی ہے۔

طارق دھاریجو کا کہنا تھا کہ ملزم نے بیان میں بتایا ہے کہ بھائی ساتھ نہیں تھے، تاہم سی سی ٹی وی فوٹیج سے تحقیقات میں مدد لی جا رہی ہے۔

پولیس کے مطابق ملزم نے سرمایہ کاری کر رکھی تھی لیکن کاروبار کوئی نہیں تھا، چند سال قبل 15 ہزار تنخواہ پر ڈرائیور کی نوکری کرتا تھا، عاطف جب میٹرک میں فیل ہوا تب بھی خود کشی کی کوشش کی، اب تک ملزم کے بیانات بے ہوشی کی حالت میں لیے گئے تھے۔

Comments

comments

یہ بھی پڑھیں