اسلام آباد: وفاقی وزیراطلاعات عطااللہ تارڑ نے وزیراعلیٰ خیبرپختونخوا علی امین گنڈاپور کے بیان پر ردعمل دیدیا۔
تفصیلات کے مطابق وفاقی وزیر اطلاعات عطاتارڑ نے کہا کہ مسلح جتھوں سے لیس ہو کر احتجاج کرنا پی ٹی آئی کا وطیرہ ہے، انہوں نے ہمیشہ ریاست اور عوام کا نقصان چاہا ہے۔
وفاقی وزیر اطلاعات عطااللہ تارڑ نے کہا کہ تحریک انتشار نے پچھلی بار بھی مسلح جتھوں کیساتھ وفاق پر لشکر کشی کی، تحریک انتشار کے مسلح جتھوں نے بلا اشتعال فائرنگ کی، علی امین گنڈاپورکےگارڈز کو گولی چلاتے ہوئے دیکھا گیا۔
ان کا کہنا تھا کہ یہ لاشیں گرا کر ان پر سیاست کرنا چاہتے ہیں، ان کا کوئی احتجاج کبھی پرامن نہیں ہوا، یہ ملک میں بدامنی چاہتے ہیں، انہوں نے ہمیشہ سیاسی مفاد پر ریاست کے مفاد کو قربان کیا ہے۔
وفاقی وزیر اطلاعات کا کہنا تھا کہ 9 مئی اور 26 نومبر ملکی تاریخ کے سیاہ ترین دن ہیں، ملتان میں بانی پی ٹی آئی کے جلسہ کے دوران بھگدڑ سے کئی ہلاکتیں ہوئیں، اس کے باوجود بانی پی ٹی آئی نے اپنی تقریر جاری رکھی۔
عطاتارڑ نے کہا کہ انہیں کبھی عوام کے جان ومال کی کوئی پرواہ نہیں رہی، خیبرپختونخوا کے عوام پہلے ہی ان کی کال کو مسترد کر چکے ہیں، عوام تحریک انتشار کی اگلی کال بھی مسترد کریں گے۔
