The news is by your side.

Advertisement

کراچی، پولیس افسر کے بیٹے کی شہری کو اغوا کرنے کی کوشش

کراچی: شہر قائد میں پولیس افسر کے بیٹے کی شہری کو مبینہ طور پر اغوا کرنے کی کوشش ناکام ہوگئی۔

اے آر وائی نیوز کی رپورٹ کے مطابق کراچی کے علاقے گلشن جمال میں پولیس افسر کے بیٹے کی دو ساتھیوں کی مدد سے شہری کو مبینہ اغوا کرنے کی کوشش کی، سرکاری گاڑی میں آنے والے شخص کے ساتھ 2 اہلکار پولیس وردی میں ملبوس تھے۔

ذرائع کے مطابق اغوا کاروں نے شہری کو اس کے گھر کے باہر سے اپنے ساتھ لے جانے کی کوشش کی۔

سرکاری گاڑی میں موجود اغوا کاروں نے مزاحمت پر نوجوان کو بہیمانہ تشدد کا نشانہ بناتے ہوئے اس کے کپڑے پھاڑ دئیے، بعدازاں اہل محلہ کی مداخلت پر نوجوان کو چھوڑ کر فرار ہوگئے۔

پولیس کا کہنا ہے کہ واقعے کی تفتیش جاری ہے، شہری کا بیان قلمبند کرلیا گیا ہے، ملزمان کو جلد قانون کے کٹہرے میں لایا جائے گا۔

یاد رہے کہ چند ماہ قبل سینٹرل پولیس نے سی ٹی ڈی آفس پر چھاپہ مار کارروائی کرتے ہوئے شہری کو اغوا کرکے تاوان مانگنے والے اے ایس آئی کو گرفتار کیا تھا۔

ٹیم نے چھاپہ کے دوران مغوی کو بھی بازیاب کرالیا تھا، پولیس کے مطابق سی ٹی ڈی اہلکار نے ایل خانہ سے دس لاکھ روپے مغوی کی رہائی کے لیے مانگ رکھے تھے۔

Comments

یہ بھی پڑھیں