کراچی : چاندی اور قیمتی موبائل فونز اسمگل کرنے کی کوشش ناکام بناتے ہوئے ایک کلو چاندی اور قیمتی آئی فون بر آمد کرلیے۔
تفصیلات کے مطابق کراچی میں کسٹمز نے جناح انٹرنیشنل ایئرپورٹ پر چاندی اور قیمتی موبائل فونز اسمگل کرنے کی کوشش ناکام بنا دی۔
دبئی سے آنے والے مسافر رضوان الطاف کے سامان کی اسکیننگ اور تلاشی کے دوران قابلِ اعتراض شے برآمد نہ ہوئی لیکن مسافر کے جوتوں کا غیر معمولی بڑا سائز اور جیبوں کا غیر معمولی طور پر بھاری ہونے پر جسمانی تلاشی میں ممنوعہ سامان برآمد کر لیا۔
کسٹمز جناح ایئرپورٹ نے بتایا کہ مسافر کی تلاشی میں ایک کلو چاندی اور قیمتی آئی فون بر آمد ہوئے، ضبط شدہ سامان کی مالیت تقریباً 35 لاکھ روپے ہے۔
کراچی:برآمد شدہ چاندی اور موبائل فونزکو کسٹمز ایکٹ 1969 کے تحت ضبط کر کے مزید تفتیش جاری ہے
پاکستان کسٹمز بین الاقوامی ہوائی اڈوں پر اسمگلنگ کی روک تھام اور کسٹمز قوانین پر سختی سے عمل درآمد کو یقینی بنانے کے لیے مستعد ہے۔
محمد صلاح الدین اے آروائی نیوز سے وابستہ سینئر صحافی ہیں اور ایوی ایشن سے متعلقہ امور کی رپورٹنگ میں مہارت رکھتے ہیں