کراچی : افغانستان سے مہلک ترین نشہ میتھفیٹا مائن آئس جاپان اسمگل کرنے کی کوشش ناکام بنادی گئی تاہم اے این ایف نے منشیات ضبط کر کے مقدمہ درج کرلیا۔
تفصیلات کے مطابق کراچی میں اینٹی نارکوٹکس فورس (اے این ایف) نے افغانستان سے جاپان منشیات اسمگلنگ کی بڑی کوشش ناکام بنادی۔
ذرائع نے بتایا کہ کارروائی کراچی کے بدرالدین یارڈ میں افغان ٹرانزٹ ایکسپورٹ شپمنٹ پر کی گئی۔
اے این ایف پورٹ کنٹرول یونٹ نے شبہ کی بنیاد پر شپمنٹ کو روکا اور تلاشی کے دوران کنٹینر سے 800 بیگ ٹالکم پاوڈر کے برآمد کیے گئے جن میں سے 25 بیگ میں خفیہ طور پر 625 کلوگرام مہلک نشہ "میتھفیٹامائن آئس” چھپائی گئی تھی۔
ذرائع کا کہنا تھا کہ یہ آئس ٹالکم پاوڈر کی آڑ میں جاپان اسمگل کرنے کی کوشش کی جا رہی تھی جبکہ شپمنٹ قندھار سے چمن بارڈر کے ذریعے پاکستان لائی گئی اور کراچی کے کیماڑی میں افغان شیڈ بدرالدین یارڈ تک پہنچی۔
منشیات کی یہ شپمنٹ کابل کے ماکروریان سے کرامت سلیمان نامی شخص نے بک کرائی تھی جبکہ منزل جاپان کے شہر یوکوہاما کنگاوا درج تھی۔
ذرائع کے مطابق پہلے کبھی پاکستان یا افغانستان سے ٹالکم پاوڈر ایکسپورٹ نہیں کیا گیا تاہم اے این ایف نے منشیات ضبط کر کے مقدمہ درج کرلیا۔
نذیر شاہ کراچی میں اے آر وائی نیوز سے وابستہ سینئر صحافی اور کرائم رپورٹر ہیں، وہ 14 سال سے زائد عرصے سے اپنے شعبے میں مصروف عمل ہیں اور انویسٹیگیٹو نیوز بریکنگ میں مہارت رکھتے ہیں، اور کراچی کے جرائم اور پولیس نظام سے متعلق گہری سمجھ بوجھ کے حامل ہیں۔